ألماسة الأسنان
مريض بدو ابتسامة بسيطه بتبييض ليزري على العيد …
و مريض بدو ابتسامة هوليوود … بس مريضتنا كان بدها ابتسامة ألماسية ؛ يعني بدها ألماسة الأسنان
بدايةً ، هيي إجراء تجميلي تابع للموضة بيكثر عند المراهقين من كلا الجنسين ؛ بتستعمل عند الأشخاص المهتمين بصحة ونظافة فمهم وأسنانهم ؛ وتوضع عادةً على القواطع والأنياب العلوية …
أنواعها …
بعضها مصمم خصيصاً للارتباط مع السن مثل حاصرات التقويم لبقاء أطول
وممكن تكون من الذهب الخالص أو الأحجار الكريمة مثل الألماس والياقوت
وأكيد هيي مانها دائمة المتانة بس بتبقى أقل شي 6 شهور .
عنا نوع ثاني لهالموضة اعتُبرت تريند بالفترة الماضية هيي مجوهرات الأسنان المتحركة يلي بتفرق عن النوع السابق
إنو هي الأحجار بتتثبت بشكل دائم عطبقة زجاجية رقيقة غير مرئية وهي الطبقة هيي يلي بتلتصق مباشرة عسطح السن بشكل مناسب له
ما بتحتاج لا تحضير ولا تخريش أو تخشين سطح السن ؛ وهي بتم صناعتها بالمخبر بناء عطبعة المريض الخاصة ؛ وإلها عدة ألوان وأشكال وأحجام ، وتعتبر غير مؤذية للأسنان أو النسج الرخوة كونها بتنشال وبتنحط من قِبل المريض نفسه بس بده .
الإيجابيات …
تجميل الابتسامة ومنحها جمال ولمعان طبيعيين
إجراء يحسن الجماليات لتبدو أكثر تألق وعصرية
إجراءات الإلصاق غير مؤلمة ، غير جراحية ، غير مؤذية ، وما بتاخذ وقت أكثر من ربع ساعة
فيك تختار مكان إلصاقها عالسن متل مبيحلالك ؛ بنص السن ، عالأطراف ..
السلبيات …
ممنوع استعمالها في حال الصحة الفموية السيئة والأسنان غير الصحيّة أو السليمة
التخريش المزمن والحساسية للأسنان والمخاطية المجاورة
كسور الأسنان خصوصاً بمنطقة الإتصال بين السن و المجوهرات بسبب ضعف هالمنطقة
تراكم اللويحة والجراثيم لأنها منطقة تجميع فضلات في حال ما اتنظفت منيح
عامل خطورة للنخر السني خصوصاً للمرضى يلي عندن مشعر نخور عالي وعدد نخور كبير
التهاب وانحسار باللثة
المجوهرات يلي تحركت او انتقلت من مكانها ممكن تعمل سحل بسطح السن
تقرح و ألم بالشفة في حال ملامستها لفترة طويلة
وأخيراً فقد السن ؛ في حال عدم العناية الكافية قبل وأثناء وبعد استخدام الألماسات
بعض النصائح لمستخدمي هذه الموضة …
استخدم المجوهرات يلي ما بتحتاج تعديل أو تحضير السن
لا تستعمل فرشاة الأسنان الآلية أول كم ساعة من إلصاق المجوهرات
ننتبه عليها وما نطبق ضغط أثناء التفريش
عدم تناول الطعام اللصاق أو القاسي لأنو ممكن توقع و وتروح عالسبيل الهضمي أو التنفسي ونصير بحاجة علاج طبي إسعافي نحنا بغنى عنه
مهم لمّا نطبقها أو نزيلها نعالج الميناء ب فلور موضعي عند الطبيب لنعيد التمعدن يلي فقدناه بالعمليات السابقة
خبرونا بالتعليقات بعد مَعرفتوا الإيجابيات والسلبيات شو رأيكن بهالموضة ؟! حدا جربها من قبل ؟!
منّـي ومن الميـددوز منتمنالكن كل الحب والتألق
– إعـداد : د. ماسة أكرم نعيم
– المصـدر الـعلمي :
https://bit.ly/3mtErMk
https://bit.ly/3yepIYa
https://bit.ly/3KY0qVL
منظمـة مـيددوز ~ مصـدرك الموثـوق للمعلومـة الطبيـة
منصة صحة الفم السورية
مواضيع صحة الاسنان والفم