يلا عالسريري …
أوّل عمل سريري إلو هيبة، لهيك رح نعرفكم ع كل تفاصيل أوّل عمل، يلا معنا …
[ الصنف الأول، أملغم ] ⛔ شو هوي الصنف الأول ؟!؟
● الصنف الأول : هو نخر على السطح الطاحن للأرحاء أو السطح الطاحن للضواحك ووبعض الحالات السطح الدهليزي و اللساني للأرحاء .
⛔ كيف منبلش الشغل ع الأصول ؟!؟
⚠️ عزل السن : عن طريق الحاجز المطاط [ مشبك بقياس مناسب، قوس وجهي، حامل مشابك، مثقب ] .
⚠️ التحضير يبدأ من الوهدة المركزية [ الوهدة الأعمق ] بسنبلة شاقة، ندخل بعمق ١,٥ – ٢ ملم، ولتسوية قعر الحجرة منستخدم السنبلة القمعية .
● بحالات النخر العميق يُفضل استخدام السنبلة الكروية على قبضة الميكرتور بعد استخدام السنبلة الشاقة كرمال مانفتح الحجرة اللبيه و طبعا فينا نستخدم مجارف العاج اليدوية .
⚠️ عرض الحفرة المناسبة منعرفوا من خلال تمرير السنبلة روحه رجعه ضمن الميزاب المركزي [ ربع المسافه بين ذرى الحدبات ]، حوالي ١ ملم كمان بالسنبلة الشاقة .
⚠️ نشكل ذنب الحمام [ وسيلة تثبيت بالمنطقة الحفافية بالعرض الدهليزي اللساني ] .
⚠️ إنهاء الزوايا الحفافيه بحيث تكون زاويتها [ ٩٠ ] درجه كرمال مايكسر الترميم .
⚠️ ومنتأكد أنو ما في أي نخر بقيان، وأنو حققنا الشكل المثبت للأملغم [ جدران دهليزية لسانيه متباعدة لأن صنف أول، وجود ذنب الحمام، أرضية الحفرة مستويه ] .
⛔ ما بعد التحضير مرحلة الترميم، هيّا بنا 😎 :
⚠️ عنا كبسولات [ دفعة، دفعتين، و٣ دفعات ]، كصنف أول منحتاج كبسولة دفعة وحدة وتعتبر كافية، منضغطها ومنحطها بالأملغميتر، طبعاً وفينا نمزجها بالجرن والقبضة بس بدها هز أكتاف💪 .
⚠️ منحط الأملغم الممزوج بجرن الأملغم ومننطلق .
⚠️ منستعمل مدفع الأملغم لننقل الترميم للحفرة بعد تطهيرها والموضوع طبعاً على دفعات [ حَبّة حبّة 💆] .
⚠️ بعدها منستعمل المدكات [ طبعاً عنا مدكات بقياسات مختلفة منستخدم الصغير منا بالمناطق الضيقة والعريض بالمناطق الواسعة ] .
⚠️ ومنعمل عملية تكثيف عمودي وجانبي .
⚠️ منكرر العملية حتى نملأ كامل الحفرة وهلأ منجي للنحت .
⛔ شو هيي مرحلة النحت ؟!؟
⚠️ بدايةً للمناحت أشكال كتير، بس كقاعدة عامة ،المنحتة المُحدبة بتعطينا سطح مقعر، والمقعرة بتعطينا سطح محدب، وأنت وفنّك يا مبدع🔥.
⚠️ ولحتى نخلّي شغلنا ع البكلة، منستعمل المصاقل اللي بتعطينا لمعة أولية، وبتساعد بتكثيف اخر طبقة من الأملغم وبتطالعلنا الزئبق الزايد .
⚠️ كمان ممكن ناخد قطنة مبللة بالمي منمسح فيها الترميم وبعدها منستعمل المصاقل فبصير عنا سطح لمّاع بشكل أولي، وبسهّل علينا عملية الإنهاء .
⛔ الإنهاء :
⚠️ بكون بعد ٨ ساعات من التصلب الأولي لهيك منأجل المريض لجلسة قادمة ومنستخدم فيها عدة أدوات :
● سنابل الإنهاء [ معدنية أو تنغستين كاربايد ]، لتنعيم كامل الترميم .
● أقماع المطاط الساحلة [ من الخشن للناعم ]، لتلميع السطوح المحدبة [ دهليزي لساني ] .
● رؤوس المطاط الساحلة للسطوح المقعرة [ السطح الطاحن مثلاً ] .
● ولا مانع من لمساتك السحرية الأخيرة بفراشي التلميع مع مسحوق الخفان 😉 .
وهيك منكون خلصنا أول عمل إلكم يا أبطال، خبرونا حبيتو الشرح ؟!؟
جاهزين لأي استفسار ومتل ما منقلكم دائما الميددوز منكم وإلكم ..❤..
إعداد وتحرير : د.مـصطفى عـبـد القـادر ســرور .
مــــيددوز ~ مـــــصدرك للـــــمعلومات الـــــطبية الــــــموثوقة 🛡 .
مواضيع صحة الاسنان والفم