فضفضة الجينيص
بعد ما بدأت أنشر عن الـHTML، واللي هي يعتبر القاعدة اللي هتبني عليها خبرتك في عالم الـWeb Development، بدأت أتسأل ازاي أبدأ في مجال البرمجة، ومع إني واثق إني مش أنسب واحد يجاوب على سؤال زي ده، ولكن خليني أديلك نصيحة من واقع تجربتي الشخصية
في البداية أنا في المجال من سنين طويلة، ولكن للأسف أغلبهم سنين بدون عائد فعلي لأني بدأت غلط، أول ويبسايت عملته كان في أواخر 2013، وكان متصمم ببرنامج الـFrontPage 2007 😂، طبعًا لما تسمع حاجة زي دي تتوقع إني بخبرة جامدة وبتاع ولكن ده غير صحيح تمامًا
أقدر أقول إني بدأت اشتغل بشكل صحيح من أواخر 2017! يعني حرفيًا ضيعت سنين كتير بخبط فيها في Desktop Programming وWeb وشوية Android، أينعم استفدت منها خبرة بسيطة ولكن ضيعت وقت طويل، طويل أوي!
ليه بقى كل ده؟ عشان مكانش فيه خطة واضحة أنا ماشي عليها، ايه ده كورس جميل؟ قشطة هدرسه، الله ايه اللغة الجامدة دي، طب ما نتعلمها، وبالتالي تشتت في كذا حاجة مش هتفيدني بشكل فعلي، وضيعت وقت على الفاضي
والحل ببساطة كان في كورسات الـIntroduction to Computer Science، نوعية الكورسات دي بتعرفك على البرمجة من فوق بشكل General، بتفهمك الكمبيوتر بيشتغل إزاي وبيتعامل مع الداتا إزاي بشكل مبسط جدًا، بتخليك تجرب كذا مجال وكذا لغة بحيث تشوف إنت ميّال لإيه أكتر
ومن أشهر الكورسات دي كورس CS50 اللي بيقدمه جامعة هارفارد، هتلاقي رابط الكورس بشكل مجاني في أول كومنت، ولكن خليني بقى في الكام كلمة اللي جاية أقولك على نصايح بشكل عام وملحوظات تاخد بالك منها
– حاول تحسن الإنجليزي بتاعك، الإنجليزي مهم جدًا في المجال ده، أغلب المصادر بالإنجليزي وصعب تتعلم باللغة العربية، لأن المرادفات مش هتفهمها لأننا مش بنستخدمها في حياتنا اليومية، يعني مثلًا لو قولتلك “Object” هتلاقي المعنى وصل لدماغك، إنما لو قولتلك “كائن” هتفهمها بنفس السرعة؟
– لو حابب تشتغل في مجالات البرمجة على العموم بعيدًا عن الذكاء الاصطناعي، اهتم بأساسيات الرياضيات، يعني اهتم بالمعاملات (جمع – طرح – قسمة – ضرب)، القوى (الأس)، التقريب… الخ، مش لازم تكون عملاق في الرياضيات ولكن الأساسيات كافية جدًا في الأول
– البرمجة مش للكل، مش لازم تتعلم برمجة، ببساطة لو المجال مش عاجبك وانت لسة بتبدأ حياتك ممكن تشوف مجال تاني، الفكر المنتشر إن الجاهل هو اللي ميعرفش لغة برمجة ده فكر خاطئ جدًا، هل لازم الكل يطلع دكتور أو صيدلي أو محاسب أو أو أو؟
– وأخيرًا البرمجة مش بتحتاج كمبيوتر قوي في البداية، أي كمبيوتر بيشغل Visual Studio Code هيشتغل معاك بشكل ممتاز في بداية مشوارك مع البرمجة، وواحدة واحدة إبقى حدث جهازك بإذن الله.
وبس كدة، ده أول بوست من فضفضة الجينيص، لو حابب أشارككم رأيي في حاجة معينة هنبقى نكتبها تحت الهاشتاج ده بإذن الله، وده الموضوع ببساطة.
الجينيص
الجنيص