الأركيلة من مشتقات الحليب 🙂 !! ..
👨: خدلك هالسيجارة ما حلوة السهرة هيك !!
👳: لا شو سيجارة ما سيجارة أعوذ بالله ما بدخن، عندك أركيلة جيب غير هيك ما بدي.
«ع أساس الأركيلة من مشتقات الحليب🙂ما خصها بالدخان💔 » ..
لنبدا مقالنا … ما بدنا نقلك لا تدخن و تأركل بس بدنا نقلك كم معلومة وأنت بتقرر ..
⛔ تأثير الأركيلة على الصحة العامة وتحديداً الصحة الفموية ..
⚠️ معسّل الأركيلة : يحتوي على النيكوتين يعني تسبب الإدمان متلا متل الدخان وأكتر بسبب التعرض الطويل للنيكوتين (الأركيلة بتبقى ساعة وساعتين تأذي الفم واللثة والأسنان بشكل هجوم متواصل ) .
⛔ طبعا نحنا كأشخاص عاديين ما منحس بتأثير للدخان والأركيلة ع الأسنان، بس إذا فحصك الدكتور، تأكد أنو من أبسط إجراء بيعرف أنك مدخن، حيث يكون واضح عند الشخص المدخن :
⚠️ أمراض النسج حول السنية :
وأهم مظاهرها ( زيادة بعمق الجيوب اللثوية/ امتصاص للعظم السنخي “اللي بيمسك السن وبثبتو بمكانو” / تراكم أكبر للجراثيم )، وهاد كلو رح ينعكس عليك مستقبلا على شكل خسائر فادحة بمعنى الكلمة.
⚠️ ضعف الاستجابات المناعية للحفرة الفموية و احتمال ظهور الآفات قبيل السرطانية و سرطانات الحفرة الفموية .
⚠️ قلّة النزف اللثوي : بسبب قلّة تروية اللثة وبكون واضح هالشي من لون لثتك الغامق (يعني اذا كانت لثتك بتنزف وبعد الدخان بطل النزف أكيد مو لأن الدخان دوا بل لأنك وقعت في الفخ 🙂 ) .
⛔ ختاما مهم نحذركن من خطورة مشاركة الأركيلة بين اكتر من شخص لأن كتير من الأمراض المعدية بتنقل بسببها، والأهم الابتعاد عن التدخين بعد إجراءات قلع الأسنان لمدة لا تقل عن يوم لأن رح يزيد الوجع كتير مكان القلع ويصير عندك حالة التهاب السنخ الجاف .
بطّـلها وكـون أرجــل منهـا .. 😉 أو خففـها منرضـى ..
تضلوا بخير 🌸
● إعداد : د. ريمـا محسن خطيب .
● تحرير : د. آيـة معـن محـمود .
● التدقيق العلمي : د. أسماء سيد سليمان .
● المصدر العلمي :https://www.ncbi.nlm.nih.gov/pmc/articles/PMC5585021/!po=12.1622
🚩 اعـتمادُ ” مِنصَّـةِ صِحـَّةِ الـفَم السوريَّـة – MedDose ”
المتخصِّصةُ بنشر الموثوقِ من طبّ الأسنـان و اختصاصاتهِ ومُحاربةِ المُعتقداتِ الطبيـَّة الخاطئـة.
مواضيع صحة الاسنان والفم