الميددوز مارح يترككم… مكفي معكم ومع التعويضات المتحركة الجزئية ~ يلا عالسريري :
⛔ المره الماضية بعتنا الطبعة الأولية على المخبري حتى يعمللنا شي اسمو ” الطابع الإفرادي” طابع مصمم مخصوص لهاد المريض…
طيب هلا شو لازم نساوي ؟!
⚠️ رح ناخد الطابع من عند المخبري؛ وبس يجي المريض منجرب الطابع بالفم؛ لما نلاحظ أن حواف الطابع طويلة أو الطابع بدو تعديلات منعدلها بالقبضه المستقيم…
⚠️ وهلا منمزج الألجينات ومنحطها بالطابع ومناخد طبعة الفك يلي فيه الفقد ومنتأكد أنو الطبعة زابطة ومنرجع منبعتها مع الطابع الإفرادي على المخبر ليعمللنا شي اسمو الارتفاعات الشمعية…
⚠️ الارتفاعات الشمعية هي شمع أحمر محطوط على صفائح إكريليلة منستخدمها لناخد العلاقة الفكية
والهدف منها هو التركيب على المطبق …
⚠️ بهي المرحلة مع شمع صف أحمر وقنديل وسكين شمع وصفيحة المطبق، بحط الصفائح يلي عليها الارتفاعات الشمعية وبتأكد من اطباقها يعني الارتفاعات الشمعية لازم ترفع الإطباق بشكل متجانس ١-٢ ملم أكتر من هيك بكون في عنا مشكلة ( لاحظ أن الصفائح مابتكون ثابتة بالفم متل الجهاز النهائي ) واذا في شي بدو تعديل تخفيض أو اضافة شمع بعملو، بعدين بصير فيني أخد العلاقة الفكية…
⛔ طيب مريضي عندو فقد بس تلت أسنان باخد علاقة فكية ولا تشابك حدبي ؟
⚠️ قال لما يكون الفقد قليل باخد تشابك حدبي ( عضة المريض العادية ) و لما يكون الأسنان البقيانه ٣-٤ باخد علاقة فكية و أنت غالباً حتشتغل الحالة الأولى…
🛑 ملاحظة صغيرة:
العلاقة الفكية هي أقصى وضعية خلفية للفك السفلي…
⛔ وبس نخلص وناخد العلاقة الفكية أو التشابك الحدبي لازم تختار لون الأسنان 😍…
وهلا بصير فينا نبعت الصفائح للمخبري حتى هو يعمللنا الجهاز والتنضديد…
⛔ لما منجيب الجهاز من المخبري مع التنضديد والتشميع بهي المرحله لازم نعمل التجربة السريرية :
⚠️ مو كل التجارب السريرية ضروري تكون ضمن الفم ( متل جهاز بيعوض عن ضاحك تاني و رحى اولى و تانية مع وجود باقي الأسنان بالجهتين ) لأن :
1️⃣ العلاقة الفكية واضحة بين الأسنان.
2️⃣الأسنان غير مشاهدة و بالتالي ماكتير في أهمية تجميلية.
⚠️طيب أمتى بعمل تجربة سريرية ؟
1️⃣اذا كان في ضرورة تجميلية
2️⃣اذا كنا مو متأكدين و شاكين بتسجيل العلاقة الفكية
3️⃣اذا كانت الأسنان الخلفية كلها مفقودة بالجهتين
⚠️ وبس نخلص منرجع منبعت المطبق للمخبري ليعمل تشميع و طبخ للجهاز …
وهيك لهون منكون خلصنا 3 مراحل جداد …
انطرونا بباقي البوستات لنحكي عن التسليم الأولي و النهائي
ولا تنسوا تحفظوا البوست عندكم لوقت ما تحتاجوا وترجعوا لسلسلة يلا عالسريري .
●إعداد وتحرير : د.رامه جبري.
مــــيددوز ~ مـــــصدرك للـــــمعلومات الـــــطبية الــــــموثوقة 🛡
مواضيع صحة الاسنان والفم