اليوم مكملين معكن بمعلومات اكثر عن التعويضات المتحركة الجزئية ~ يلا عالسريري…
انت ك طالب لما تلاقي مريض التعويضات المتحركة الجزئية بيرتفع عندك هرمون السعادة🥰…
ونحنا لنزيدك سعادة ح نشرحلك خطوات العمل بهالمرحلة بالتفصيل لهك يلا عالسريري…
⛔ أول شي حنجيب أدوات الفحص ( مرايه – مسبر – ملقط ) ونبلش فحص للحالة شو لازم نعمل:
⚠️ ناخد القصة المرضية للمريض ( و هي كتير مهمة بالعمل السريري).
⚠️ نفحص حالة الأسنان المجاورة لمكان الفقد ( متهدمين , بدن معالجة لبية , فين نخور ..) ولازم تعرف شو الأسنان المفقودة و يلي بدك تعوض عنها.
⚠️ نفحص حالة السنخ ( ممتص , في بروزات عظمية )
⚠️ ونحن بحاجة لـ صورة بانوراما كرمال نتأكد أنو مافي بقايا جذور بالسنخ أو أسنان منطمرة.
⛔ تاني شي بعد مافحصت الحالة و قبلك ياها الدكتور المشرف صار فيك تباشر بالعمل😎:
⚠️ بالبداية ح نحتاج بهي المرحلة ل ( طوابع بقياسات مختلفة – ألجينات – كجّة وملوقة – أدوات الانفكش كونترول وح تحتاج لكيس نايلون ).
⚠️ بعد ما نعقم الطوابع ح نجرب الطابع ونختار القياس الأنسب بحيث يبعد ٢ ملم عن الميزاب الدهليزي ويكون بيحوي كل الأسنان.
⚠️ ح نمزج الألجينات ( للتذكير مكيالين بودرة لمكيال مي بحالة فك سفلي و ٣ مكايل بودرة و مكيالين مي للفك العلوي ) ونتأكد أنو عم نتخلص من الفقاعات وقت المزج.
⚠️ منحط الطابع بفم المريض وبحالة فك علوي منضغط من الخلف للأمام؛ وبالفك السفلي لازم تنبّه المريض أنو يرفع لسانو لسقف الحلق و بتضلك ساند الطابع و مابتفلتو لتتصلب الطبعة.
⛔ بهي المرحلة بالذات ممكن تواجه منعكس الإقياء
شو منعمل كرمال ماتخرب الطبعة؟!
⚠️ ح نحاول نشتت انتباه المريض منطلب منو يرفع ايدو أو رجله.
⚠️ ح نطلب من المريض يتنفس من الأنف وليس الفم ( لازم تحس بنفس المريض على ايدك أنت و ماسك الطابع )
⚠️ في حال كنت بتعرف أنو المريض عندو منعكس إقياء بتنصحوا بـ المضمضه بماء بارد و للحالات الشديدة ممكن نخدر ( حقنة حدبه فكية ).
⛔ بس تتصلب الألجينات بصير فيك تنزع الطابع من الفم ( بتدخل السبابتين على جانبي الطبعة و بحركة ضغط للأسفل و بشكل سريع لتحرر الطبعة).
⛔ ليكون الشغل صحيح لازم نفحص الطبعة :
⚠️ لازم تكون خاليه من الفقاعات
⚠️ حوافها متجانسه مو مشرشرة
⚠️ حاوية على كل الأسنان
⚠️ بتظهر فيها المعالم التشريحية ( ميزاب دهليزي , الحدبة الفكية بالفك العلوي والمثلث الرحوي بالفك السفلي , الألجمة )
⚠️لازم الطبعه تكون متصله بالطابع.
⛔ بس خلصت ووافقلك الدكتور المشرف على الطبعة بتحط عليها محارم مبلله بمي و بتحطها بكيس نايلون و بتبعتها عالمخبري ليعملك الطابع الإفرادي يلي ح نحكي عنو الجلسة الجايه.. استنونا😎
🔰 وهيك بتكون خلصت أول مرحلة من مراحل التعويض المتحرك الجزئي و لا تنسى توعد المريض للجلسة الجاية وجهزلنا اسئلتك لنجاوب عنها ♥️.
● إعداد وتحرير : د. رامه جبري.
مــــيددوز ~ مـــــصدرك للـــــمعلومات الـــــطبية الــــــموثوقة 🛡
مواضيع صحة الاسنان والفم