كل سنة في 5000 امرأة حول العالم بتخسر حياتها بسبب ما يدعى ” بجرائـم الـشرف ”
سنوياً بسوريا في عدد كبير من هالجرائم ؛ لكن معظمها بيتم تعتيمها وما منسمع إلا ببعضها .. لكن الأرقام الحقيقة أكبر وأخطر !!
لحد اليوم بيجوا لعنا الأهل على المشافي والعيادات مع طلب .. اكشفولنا على هالصبية ؛ بدنا نتأكد إنها ” بنت ” !
ولحد اليوم .. بتبقى الأم ناطرة على باب غرفة الزوجين ليعطوها دليل الشرف !!
وما بتبدأ الاحتفالات إلا بعد عرض ” هالتحفة الفنية ” يلي هيي عبارة عن منديل ملوث ببضع قطرات من الدم !
وفجأة ممكن يتحول الفرح لكارثة و جريمة ؛ لو طلع هالمنديل أبيض دون اللون المُنتظر !!
هاد الكلام لحد الآن موجود بالعديد من المناطق السورية ..
ولحد الآن عشرات الفتيات بتم قتلهم بكل روح باردة تحت مُسمى ” غسل العار ” .. والقانون لا حياة لمن تُنادي !!
بعد مواجهتنا للعديد من هالقصص ؛ كان لابد لنا أن نتطرق للموضوع بشكل طبـي وعلمـي بعيداً عن المُعتقدات الخاطئة السائدة ..
رغم أنه يعتبر من ” التابوهات المجتمعية ”
إلا إنو بسببه عم تخسر آلاف السيدات حياتهم !
⛔ غشـاء الـبكارة »» بين الحقيقة والخُرافات ⛔
عند البعض غشاء البكارة ونزول الدم عند الجماع هو كامل الشرف ، وعدم نزول الدم هو السيف يلي رح نحط على رقبة الفتاة ..
⚠️• علمياً : غشاء البكارة هو غشاء رقيق جداً 1-2 ملم مكون من نسيج ليفي مرن وخلايا بالمحيط ، واوعية دموية ، و أعصاب.
⚠️• كلّما كان غشاء البكارة مطاطي ( مرن ) وفوهته واسعة كان احتمال ألّا يترك الجماع تمزّقاً فيه أعلى .
⚠️• وللغشاء عدة أشكال ، منها من يتمزق بدخول أي جسم أجنبي ” مثلا الجماع الأول ” ومنها أغشية لا تتمزق إلّا بجماعات متكررة ، ومنها أغشية لا تتمزق إلّا أثناء الولادة.
⛔ لهيك بكل بساطة »» ليس كل جماع يجب أن ينتهي بتمزق غشاء البكارة ونزول دم ..
⚠️• وفي حالة مرضية اسمها : ” عدم انثقاب غشاء البكارة ”
وهي حالة بكون فيها الغشاء مسدود خلقيّاً بشكل تام وبتبلغ الفتاة وما بتيجيها الدورة بسبب انو الدم عم ينزل من الرحم باتجاه المهبل بس الغشاء مسدود وبضل يجمّع دم وبيعمل ألم دوري شديد قبل وأثناء الدورة..
والعلاج بسيط جداً ؛ شق جراحي للغشاء فيزول الانسداد .
⚠️• ملاحظة : ممكن ب 5-7% أن يندمل غشاء البكارة بعد تمزّقه دون أن يترك أثر .
لهيك من الناحية الطبية في استثناءات بهاد الموضوع ؛ يعني مافي 1+1=2 !
خلونا نتخيل سوا عدد النساء المظلومات .. عدد النساء المقتولات !
هل روح الإنسان مُرتبطة بغشاء ؟!
هل من حق أي إنسان بالحياة يحكم على إنسان آخر بالموت بسبب قطرة دم !
لربما كان الموضوع حساس ؛ لكنه بحاجة توضيح من ” جهــة طبيــة موثوقــة ” .. لعل وعسى يكون هاد المنشور شفيع لأرواح العديد من النساء ..
🔴 » للمزيد : المنصة الدوائية السورية – MedDose
(ميددوز)