” الكارثة الكُبرى ” في الحياة اليومية…….
تفريش الأسنان
يا جماعة رح عرفكن عن حالي انا السن اي السن جاي احكي باسمي و باسم باقي الأسنان هالكم كلمة
ببوس ايدكن يا جماعة انا مو ناقصني قوة كبيرة تطبقوها علي و انتو عم تفرشوني… هالشي عم يزعجني كتير و يدايقني انا و اخواتي
هالشي الو تأثير سلبي و خاصةً ب موضوع التآكل
اكيييد ما بتقبلو تشوفوني عم بتآكل مو ؟
متل ما بتعرفو يلي عم يغطيني من برا و يحميني هية طبقة اسما الميناء و انتو من خلال تفريشكن لإلي بقوة عم تخلو هي الطبقة تزول مع الوقت
و المشكلة هالطبقة اذا راحت بتنطمز و ما عاد ترجع مع الأسف يعني مافيني عوضا
و عم حافظ عليها قدر الامكان…
ف من هلأ عم قلكن اذا هالطبقة صرلا شي رح يصير في عي و مشاكل كتير (قد اعذر من انذر )
مشان هيك ع مهلكن شوي الله يرضى عليكن
من هالمشاكل يلي ممكن اعملا ( من باب التحذير ) :
حساسية الأسنان و اللمعان و بالتالي أي منبّه بيدقرني (متل الطعام) بصير قادر انو يحدث استجابة عصبية و خليك تتوجع لتقول حاج
عم قلكن مو نصيحة….
و أصلاً لما انت تفرشيني بالفرشاة مع أو بدون معجون أسنان رح يصير في تآكل ضئيل بالميناء بسبب الخصائص الفيزيائية لمعجون الأسنان و فرشاة الأسنان المستخدمة ( يعني مادة عم تنحط علَي و عم يصير احتكاك بشكل عام ) .
مشان هيك قلتلكن مو نااقصني
و مو بس هيك….
التآكل ممكن انو يتأثر ب تكرار تنظيف الأسنان
يعني مو ألف مرة باليوم تفرشيني مو شطارة الشغلة….
( مرتين كحد أدنى و بعد كل وجبة كحد أقصى ) .
و ياريت تدللني و تفرشيني بعد كل وجبة و تحس فيني…
أحسن ما قول لرفيقتي اللثة (النيرة) تفوت فوتتا لأنو هي اذا بس تراجعت و صارت تنزف راحت عليك و وقتا انا ما دخلني….
ف ياريت يا حبيبي متل ما انا عم ساعدك بالأكل و طحن الطعام انت كمان تساعدني و تفرشيني على مهلك و بهدوء و لا تكتر من التفريش اليومي لتحافظ علي طول العمر و نضل سوا .
إعداد : د عمر قدورة .
المصدران العلميان :
https://bit.ly/3L7Bt7o
https://bit.ly/3v40Bqk
منظمـة مـيددوز ~ مصـدرك الموثـوق للمعلومـة الطبيـة.
مواضيع صحة الاسنان والفم