بتفيق من الصبح متفائل ونشيط، بتطلع بالمراية 💃
فبتنصدم وبتتفاجأ وبتلاقي شفايفك منتفخة ومورمة 😳كيف وليش ما بتعرف !؟ …
فبتخاف وبروح التفاؤل كلو
ف تعالوا ندردش سوا مشان التفاؤل يضل 😌…
⛔ انتباج الشفة ممكن يكون رد فعل تحسسي أو بكون نتيجة إنتان أو أحد المتلازمات…
بالنتيجة بتتراكم سوائل بأنسجة الشفة على شكل وذمة.
هلق الأسباب كثيرة وبتختلف من شخص للتاني:
⚠️ ممكن يكون عندك حساسية لبعض الأكلات متل( الحليب / البيض / السمك / المكسرات/ التوابل /الحد / البقدونس و الكزبرة)…
وبهالحالة بتتطور الحساسية بسرعة بعد ما تاكل هي الأكلات فوراً…
⚠️ ممكن يكون عندك حساسية لبعض الأدوية💊 متل البنسلين وغيرو من المضادات الحيوية أو ممكن يكون السبب لدغة حشرة…
⚠️ أحياناً الإنتانات الفيروسية متل فيروس الحلأ البسيط بسبب تورم الشفة و بيترافق مع قرحة…
⚠️ كمان إذا كان يوم في شمس حامية🥵 وانت قضيتلك كم ساعة برا بصير عندك حروق شمس خطيرة وبتتورم شفايفك
لهيك دايماً استخدم واقي للشمس…
⚠️ في عنا:
▪️ متلازمة “melkersson rosenthal” هيي حالة عصبية نادرة بتسبب تورم الشفاه…
▪️ومتلازمة ” Stevens Johnson” بتسبب وذمة و تقرحات شديدة في الشفاه…
⚠️ علاج الأسنان متل التقويم وغيرو ممكن يسبب رض للشفاه بعد المعالجة بيوم…
⚠️ كمان إذا كان عندك التهاب بتمك أو باللثة ممكن ينتقل للشفاه وتنتفخ🥺…
⚠️ ممكن يكون الانتباج دليل على ورم الغدد اللعابية الصغرى الموجودة ضمن نسيج الشفة…
⚠️ وإذا كان عندك جرح أو ماكل شي ضربة عتمك👊 بتتورم الشفة كمان…
⚠️ إذا فقت شي نهار ولاقيت جهة وحدة من تمك مرتخية أو نازلة وعندك سيلان لعاب كتير أو مثلاً عندك مشكلة بالكلام انتبه ✋وشوف دكتور فوراً لأنو هي من أعراض السكتة الدماغية أو شلل بل اللي رح نحكي عنه لاحقاً…
⛔ طيب شو العلاج⁉️
⚠️أوّل وأسهل شغلة فيك تعملا أنك تلف كيس ثلج بمنشفة وتحطو عتمك لأنو بقلل الالتهاب…
بس إياااك تحط الثلج عالجلد مباشرةً بدون منشفة لأنو هيك بتكون عميتا بدل ما تكحلاا…
⚠️ إذا كان سبب الانتباج هوي حرق شمس فيك تستعمل مرطبات حاوية على الألوفيرا رح تفيدك…
⚠️ وممكن كمان تحط مرطب شفاه💋 إذا كان في تشقق أو جفاف…
⚠️بالنسبة للأدوية💊 فيك تاخد مضاد التهاب لا ستيروئيدي متل الإيبوبروفين…
و بالنسبة للانتانات الفيروسية فينا نستخدم الأسيكلوفير مباشرة أول ما نحس بالشفة عم تنتبج.
🔰 هي الشغلات بتعملا بالبيت لما بتكون الحالة بسيطة بس لما بصير التورم بكل تمك وحتى لسانك ويستمر أكثر من 24 ساعة أو صار عندك ضيق تنفس فلازم تشوف دكتور فوراً وهوي بيعطيك العلاج المناسب…
تضلوا بخير ❤️
● إعداد وتحرير : د. لجين عماد الحسين
● المصدر العلمي :
https://bit.ly/3gxWZpB
https://bit.ly/3vfkhVw
🚩 اعـتمادُ ” مِنصَّـةِ صِحـَّةِ الـفَم السوريَّـة – MedDose ”
المتخصِّصةُ بنشر الموثوقِ من طبّ الأسنـان و اختصاصاتهِ ومُحاربةِ المُعتقداتِ الطبيـَّة الخاطئـة .
مواضيع صحة الاسنان والفم