بقالنا فترة بنتكلم عن تحسين أداء الموقع، وخليني النهاردة أكلمك عن الـCDN، ودي من الحاجات اللي لو تعلمون عظيمة، بوست النهاردة قصير وبسيط جدًا ومناسب للمبتدئين فـ ماتقلقش 😄
في ملفات مشروعنا كـ “موقع إلكتروني”، بيبقى عندنا فايلات CSS وJavaScript لمكتبات كتير بنستخدمهم بشكل معتاد، زي مثلًا Bootstrap أو Foundation أو Bulma (مش لازم تبقى عارفهم كلهم، مكتبة واحدة كفاية جدًا في البداية)، والمكتبات دي بتديلك لينك تضيفه في موقعك بدل ما تنزل الفايلات نفسها وتضيفها في مشروعك
والسؤال هنا، هل لو ضيفت الفايلات لمشروعك واشتغلت عليها على طول هيحصل مشكلة؟ إطلاقًا!
يبقى السؤال هنا، ليه العالم اتجه انه يديلك لينك بدل ما يقولك نزل المكتبة دي وخلاص؟
الإجابة يا عزيزي بترجع للـCDN، وببساطة طالما المكتبة دي بيستخدمها مواقع كتير، والمحتوى بتاعها ثابت، ليه كل موقع بنزوره لازم المتصفح يحمل الفايلات دي من تاني؟ ما يحملها مرة واحدة ويستخدمها على كل المواقع اللي بتحتاجها من الكاش؟ مش كدة هنوفر وقت واستهلاك انترنت، وكمان هنخفف العبء من ع السيرفر؟
وهو ده بالظبط اللي بتعمله الـCDN، سيرفرات كتير على مستوى العالم، أول ما بتستقبل Request بفايل معين متخزن عندها بتبدأ تخزنه في الكاش، ومع أي موقع تاني أو حتى نفس الموقع بيحتاج نفس الفايل مرة تانية مش بيكون في حاجة إنها تنزل الملف ده مرة تانية
ومش بس كدة، بدل ما السيرفر بتاعك لوحده هو اللي فيه الفايلات دي، كمان انت بقى متاح قدامك مئات السيرفرات من مختلف أنحاء العالم، فـ لو المستخدم مكانه الجغرافي بعيد عن المكان الجغرافي للسيرفر بتاعك، الـCDN هتوصله بأقرب سيرفر ليه وتبعتله الفايل بشكل أسرع بمراحل!
وهنا السر، لو في مكتبة بتديك خيار إنك تستخدم لينك من الـCDN، دوس على طول، هتوفر عليك Load Time، وتقلل الحمل على السيرفر، وفي النهاية هتخلي تجربة المستخدم أسرع.
وبس كدة، ده كان الموضوع ببساطة، لو حسيت ان في حد ممكن يستفاد من البوست ده متنساش تشاركه معاه، ودي كانت حاجة خفيفة كدة Lightweight نستفتح بيها اليوم.
الجينيص
HTML5 Notes
الجينيص