شرح تفصيلي للـHexadecimal Color Notation
كتير في حياتنا البرمجية (وحتى أصدقائنا الـGraphic Designer) بنستخدم صيغ ألوان مختلفة، زي الـRGB والـHSL، واللي هنتكلم عنها النهاردة ألا وهي الـHexadecimal Notation
كلمة Hexa هي كلمة لاتينية بمعنى سداسي، وده لأننا بنعرف اللون بمقطع نصي مكون من أرقام وحروف عددهم ٦، في اختصارات أو امتدادات تانية هنتكلم عنها في نهاية البوست
وعلى سبيل المثال، اللون ده
FF0000
مكون من ٦ مقاطع، المقاطع دي عبارة عن حروف (F) وأرقام (0)، ومش عارف بقى هتصدقني ولا لأ ولكن اللون ده هو اللون الأحمر 😄، عرفت ازاي؟ خليني أشرحلك
في الـHexadecimal Notation بنعبر عن الـRGB Colors، ودي اختصار للـRed Green Blue، والألوان دي مع بعض بنسب مختلفة (من ١ لـ٢٥٦) بتقدر تنتجلنا أكتر من ١٦ مليون لون، بالظبط ١٦٧٧٧٢١٦ لون، وده بالظبط حاصل ضرب ٢٥٦ في نفسها ٣ مرات
ازاي بقى المقطع السداسي ده بيعبر عن أكتر من ١٦ مليون لون؟ الموضوع ببساطة بيكمن في الحروف والأرقام
في الـHexadecimal Color Notation بيزداد شدة اضاءة اللون مع التدريج من 0 لـ15، ولكن لأن احنا هنا بنخزن ٦ مقاطع بس، فـ اضطرينا نستخدم حروف بتعبر عن القيم ما بين العشرة والخمسة عشر، وهم بالترتيب من حرف الـA لحرف الـF
وبكدة يكون الـ0 معناه عدم وجود اللون ده تمامًا، والـF بتدل ان اللون هنا وصل أقصى حاجة ليه، هتلاقي لينك في أول كومنت بيتكلم عن الموضوع ده بشكل أعمق
تعالى بقى نطبق اللي درسناه دلوقتي على المثال اللي قولتهولك فوق، وانت بنفسك هتقدر تحدد اللون بدون أي تنويه أو مساعدة مني
فاكر الـFF0000، خلينا نقسمها كدة للـRGB
اللون الأحمر هياخد الـFF يعني أعلى شدة اضاءة للون
واللون الأزرق والأخضر واخدين 00 يعني غير موجودين تمامًا
المهم نرجع لكلامنا، في العالم الحقيقي لو حطيت لون أحمر على أخضر هيطلعلك أصفر، فـ ببساطة نقدر نقول ان الرمز بتاع اللون الأصفر هو الـFFFF00، اللي بيعبر عن أقصى شدة اضاءة من لونين الأحمر والأخضر مع عدم وجود اللون الأزرق
درب نفسك معايا كدة ع الألوان دي وقولي في الكومنتات
00FF00
0000FF
000000
أخر مثال ده غريب شوية؟ طب هديك Hint ممكن يساعدك
دلوقتي لو جمعنا اللون الأحمر ع الأخضر ع الأزرق، تفتكر إيه اللون اللي ممكن يطلع؟ مظبوط اللون الأبيض، لأنه مزيج بين كل الألوان الأساسية، أعتقد دلوقتي تقدر تحدد أخر مثال ده هيبقى لون ايه بالظبط
وعشان البوست يكون مفيد أكتر وفيه معلومات كتير، عاوز أقولك ان الرمز لما بيبقى عبارة عن أزواج متساوية لكل لون ممكن نختصر لـ٣ مقاطع بس
على سبيل المثال، اللون الأحمر FF0000 بيتكون من زوج من الـF في الـRed، وزوجين من الـ0 في الأخضر والأزرق
وهنا ممكن نختصرهم للـF00 وهنحصل على نفس اللون في النهاية
ايه المطلوب منك بعد ما خلصت البوست ده؟
– تبحث عن الـHexadecimal Color Opacity
– تحل الأمثلة وتقولي حلك في الكومنتات
ويا سيدي اللايك والشير ده من عندك بقى ☺️
وبس كدة، ده الموضوع ببساطة.
الجينيص
CSS Notes
الجينيص