🔴 العلاج الطبي بيكون إزاى⁉️
بيكون بالقطرات والمراهم المضادة للإلتهاب, مع الكمادات الدافية, ولو فيه عدوى بيتوصف مضادات حيوية طبعاً.
فى نسبة كبيرة من الحالات العلاج الدوائى ده بيجيب نتيجة والكيس الدهنى بيختفى فى خلال إسبوعين.
لكن لو العلاج مجابش نتيجة والكيس عنّد معانا وفضل متمسك بموقعه, يبقى مفيش حل إلا إزالته جراحيا بعملية بسيطة جداً والعيان بيخرج بعدها يروح بيته بمنتهى البساطة.
طبعاً فيه سؤال بيتبادر في ذهن الناس لما تسمع كلمة جراحة, هل الكيس ده لو أنا سبته كده من غير عملية, فيه مشكلة⁉️
والله هو لو الكيس مش مسبب أى مشاكل والحالة مستقرة ممكن نسيبه 🤷♂️, خاصة إنه عند بعض الناس بيبقى إستعداد شخصى, يعنى قابل للتكرار, وكل ما يتشال واحد يظهر غيره 😅, لدرجة إن العيان بيزهق من كتر ما شاله وطلع تانى ‼
إنما لو الكيس ده إلتهب فى أى وقت, يعنى حصلتله عدوى خلته تحول لخراج فعلاً مش مجرد كيس دهنى, طبعا لازم يتشال. 🔪
غير إن بعض الحالات الكيس فيها بيواصل نموه لدرجة إن المريض بيبقى شايفه قدام عينه فى مجال بصره, وأحيانا يتقل الجفن فيقفل العين, هنا طبعاً مينفعش يتساب, مفروض يزال حتى لو هيظهر تانى ماهو مش هنسيب المريض شايف كتلة قدام عينه طول الوقت أو عينه مقفولة ومش عارف يفتحها ‼
وفى جميع الحالات قرار إزالة الكيس أو تركه مفروض يبقى قرار الطبيب, على حسب طبيعة الحالة لأن طبعا النظر نعمة غالية مفيش مجال نتركها للمغامرة. 🤷♂️
تمنياتى لجميع الناس بدوام الصحة والعافية ولجميع المرضى بالشفاء العاجل 🤲🏻♥️
د. خالد طلبة الشبراوي
رابط الجزء الأول بالتعليقات
(سماعة حكيم)
Kh Alid