💥 طيب شو السبب 🤯..
💥 سؤال متكرر من الأمهات ..ليش ابني ما عم ياكل رح يجنني وخايفة عليه 😭
وصدقا في أمهات بوصلو لدرجة البكاء من هل الموضوع وهاد طبعاً من خوفن وقلقن المبالغ فيه على صحة أطفالن 🙄
💥 طيب شو الحل
💥 أول شي لازم تعملو الأم هو زيارة طبيب الأطفال
وهاد الشي ضروري لنفي الأسباب المرضية الي بتخلي الطفل يرفض الطعام متل وجود فطور مؤلمة بالفم أو قلاع أو التهاب حاد بالعلوم أو حالة التسنين أو نخور سنية عند الأطفال الأكبر أو حرارة عالية ووهن أو تناول أدوية معينة بحالات مرضية معينة أو عوز فيتامينات ومعادن متل الزنك والحديد..أو أو أو … أسباب مرضية كتيرة …
وهاد الشي ضروري ضمن خطة الفحص الدوري للأطفال يلي للأسف الأهل بيغفلو عنها وما براجعو الطبيب غير وقت المرض🤧
لهيك النصيحة الأولى هي زيارة طبيب الأطفال 😘
💥 رحنا عالدكتور وما استفدنا 😅
هون لازم نبحث عن الأسباب الثانية الغير مرضية ويلي هي :
1. أسباب ما الها علاقة بالحالة النفسية للطفل:
💥 مثل إنو الأم عم اطعمي الطفل بملعقة غير مناسبة .. كبيرة على تمو مثلاً وهاد شي مزعج للطفل فببساطة رح يرفض الطعام 🙄
💥 أو مثلاً طفل صغير حاجتو صحن صغير.. والأم بدها ياه يخلص صحن كبير .. وهاد رغم انو مو منطقي بس بعض الأمهات بضلو مصرين على هل التصرف .. والحجة “مشان تكبر معدتو” 😅 وطبعاً هاد تصرف خاطئ تماماً
💥 الأم مشغولة وبدها اطعمي الولد بسرعة مشان تلحق زيارة أو شي قصة .. وببساطة الطفل بيحب يستمتع بالأكل وياخد وقتو .. ووقت الأم أو المربية بتعاملو هيك.. ببساطة بيرفض الطعام
💥 وبكل بساطة ممكن يكون الوقت مو مناسب مع الطفل .. مثلاً ما بحب ياكل بس يفيق فوراً أو قبل النوم وهاد عنجد من مزاج الطفل يلي لازم تحترموه 😅
2. الأسباب النفسية :
وهي للأسف رغم إنها سبب كبير وممكن تكون أهم سبب لرفض الطعام عند الطفل .. بيتجاهلوها الاهل أو يمكن ما بينتبهو الها أو بصراحة يمكن ما بيعرفو إنها بتأثر حتى ..
💥 الأسباب النفسية لرفض الطعام عند الطفل فينا نسميها اضطراب سلوكي …وهي باختصار بتتجلى بهي النقاط:
💥 السلبية : وهي عبارة عن ظاهرة شائعة بين الأطفال بعمر بين 1-3 سنة وهاد السلوك بمارسو الطفل ..فقط للتعبير عن استقلالو الذاتي
💥 وسيلة ضغط لا شعورية بيستخدمها الطفل للضغط على الآخرين لسبب ما.. أو لحتى يعبر إنو هو رافض الظروف الي عم تمر فيها الأسرة
💥 ردة فعل على عقاب الطفل: لما الأهل بعاقبو الطفل بطريقة هو ما بيفهمها مثل الضرب أو الصراخ أو التأنيب المتكرر لأي موقف ما… بتتجلى ردة فعل الطفل برفض الطعام
💥 المعاناة من القلق و الوحدة .. طفل لحالو أغلب الوقت غير مختلط مع بقية الأطفال .. بتخلي الطفل يرفض الطعام
💥💥💥💥💥💥💥💥💥💥💥
منشوري طويل هل المرة وطولت عليكن 😅
بتمنى تستفادو منو لتعرفو تتعاملو مع الطفل
ودائماً اتذكرو إنو مخططات النمو يلي بعطيكن ياها بالعيادة ..هي أهم وسيلة لمراقبة نمو الطفل ومعرفة حالتو الغذائية 😘😘😘
مع محبتي
د سهير الحسين
ماجستير بورد سوري في طب الأطفال
💖💖💖💖
(سماعة حكيم)