👶🏻 لهيك يا رفيقي خلينا نحكي عن الفطام بما يهواه قلبنا ونعلم مامياتنا كيف يتعاملوا معنا بهالمرحلة الحساسة والمصيرية من حياتنا 😓
👶🏻 مامياتنا العزيزات أول سؤال بتسألوه لحالكم ايمت فيي أفطموا لابني ؟ وطبعاً معظمكم بتتمنوا تفطمونا من تاني يوم والحق معكن بعرف عذاب الرضاعة الطبيعية وهمها وكيف بتحرمكن النوم والراحة بس أنتوا لازم تعرفوا أنو الرضاعة الطبيعية مهمة وضرورية ومقدسة حتى عمر ال6 أشهر حسب توصيات الأكاديمية الأمريكية لطب الأطفال ❤️ من بعد هالعمر بصير الفطام حسب قرار الأم وابنها سوا يعني لو كانت الماما بالبيت والطفل هني ونغش وغير متطلب ففيها تفطموا متأخر بس لو كانت هيي موظفة مثلاً أو ابنها بعذبها كتير بفيق بالليل كتير ليرضع ممكن تبكر موعد الفطام !
👶🏻 منظمة الصحة العالمية بتوصي يا ماما يصير الفطام ععمر السنتين وأكاديمية طب الأطفال بتوصي عالسنة والغالبية الدارجة بتقلك عالسنة بصير الطفل يقدر يمشي ويحكي ويعني بيكبر شوي وبيوعى وبخف تعلقو بأمو وهيك .. بالنهاية نيالو يا ماما كل بيبي بتقدر أمو تغنجو وتدلعو وتضل ترضعو لحد العمر الطبيعي عالأقل سنة 🧘🏻♀️
👶🏻 في كم شغلة منعملها نحنا البيبيات لنقلك بشكل غير مباشر أنو ما عاد بدنا الرضاعة الطبيعية خلص بيكفي وطبعاً ما بيفهم بهالعلامات غير الأخصائيين بنفسياتنا المعقدة لهيك يا ماما وقت تشوفينا ماننا مهتمين بمعمل الحليب أو بدك ساعة لتقنعينا نرضع فهي علامة من علامات جذب الفطام ..
كمان لو شفتينا ما عم نطول بقعدة الرضعة .. بس تقليلنا خلص ما عاد في حليبة منروح بسهولة .. عم نمص المعمل بس للتسلاية مو لشرب الحليب .. وأهم شي بس نجي لنرضع منشد ومنعض ومنقطش ومنلحش معلش مهم الكف اللطيف وتعليمنا بحزم أنو هاد مو للعض ويلا روح من هون 🥲😂
👶🏻 حتى يصير وقت الفطام أسهل عليي وعليكِ يا ماما يفضل تصير التغييرات هيي بالتدريج وبمرور الوقت يعني ممكن تصيري تقتطعي وجبات الرضاعة يوم ورا يوم .. نتخلى عن رضعة نص النهار بعد بيومين نتخلى عن تبع قبل النوم وهكذا .. وحتى نتعود على قصة أنو ما عاد في حليبات طبيعيات يفضل يا ماما تعوديني على أنو في شي اسمو ببيرونة فيها حليب تعتبر خيار طعامي لذيذ .. إذا كان عمري أقل من نص سنة بكون حليب هالببرونة هوي نفسو حليب صدرك بس ضاخيته وحافظتيه وإن كنت أكبر بينفع الحليب الصناعي 🥱
كمان ماما وقت بكون بلشت اكل بصير الأكل ينسيني الرضاعة فبكون الفطام أسهل .. المهم نبهك أنو لا تحاولي تفطميني بأوقات صعبة عليي متل مرضة أو تسنين أو هيك شي .. وقت بدك تفطميني حاولي بوقت الرضعة المعتاد لهيني لعبيني طعميني شي تاني .. التياب والحركات والحكي والجو يلي متعود عليهن يكونوا بس أرضع كبيهن حتى ما أتذكر .. اصبري عليي وأنتِ عم تعوديني عالشرب من الببرونة أو الكاسة اذا مو معودتيني عليها من قبل وأخيراً إذا كانت عندي عادات سيئة بأني مص اصبعي او مص البطانية فتركيني لا تقاوميني لأني هون بكون عم عوض الجفاف العاطفي يلي صار بعد الفطام 🙂💔
👶🏻 بالنتيجة الفطام هوي معركة شخصية بتخص البيبي والأم وآثار المعركة بتتحدد حسب رواق الأم وصبرها وحسب مزاج البيبي وعنادو .. بالأخير الكل رح ينفطم عن الحليب وعن غيرو بس القصة بدها وقت ووعي وحكمة منك يا ماما تعرفي تضحكي علينا مزبوط 😏
منحبك يا جبّارة ❤️
كنت معكم سَماح صالح محمد ♥️
(سماعة حكيم)
المصدر :
https://kidshealth.org/en/parents/weaning.html
Samah Saleh Mohammad
يعطيك العافية
طريقتك بالشرح رائعة
Aman Alkhatib زيد وعمر
كتير حلو الحكي ومريح للنفس
Laila Kassis ياويلي شو بدها تعمل فيكي ايميلي
خليييلي
كل الحب