رحلة يلا عالسريري مكملة معكم، وهلّا صار دور
[ #الصنف_الثاني أملغم و كومبوزيت ]⛔ شو هوي الصنف التاني ؟!؟
هو النخور الملاصقة ويقسم لقسمين …👇
▪️قسم طاحن ” جدار لبّي ودهليزي ولساني” .
▪️حُفرة عُلبية ” جدار محوري ولثوي ” .
يلا نشرح أكتر🔥
⚠️ القسم الطاحن :
▪️نفس تحضير الصنف الأول مع المحافظة على :
▪️برزخ ضيّق قدر الإمكان ” عرض السنبلة الشاقة فقط” .
▪️ذنب حمام في الجهة المقابلة للحفرة العلبية في حال الحفرة MO & DO .
▪️انفراج إطباقي بسيط بجهة ذنب الحمام [ حتى ما نضعّف العاج 😉] .
⚠️ الحفرة العُلبية :
▪️تقدير مكان الجدار الدهليزي واللساني، ( يعني شغلّ مُخيلتك 👌) حتى ما نمدد السطح الطاحن زيادة عن حاجتنا .
▪️منبدأ التحضير بسنبلة شاقة من السطح الطاحن باتجاه الجهة المراد تحضير الملاصق فيها، ولمّا نوصل للوهدة اللي بهي المنطقة منوسع البرزخ عندها دهليزي لساني حتى نوصل لقبل الحفاف ب 0.8 ملم [ يعني بتوقف لما بصير سماكة الحفاف مماثلة لقطر راس السنبلة الشاقّة ] .
▪️هلا منبلش بهالنقطة نروح دهليزي ولساني بشكل أكبر .
ركززز معي هلا منيح 🔥
في شي رح يتشكل عنا اسمو [ القوس المعكوس Reverse Curve ]، وهاد منشوفو من منظر إطباقي ، خلينا نحكي عنو هيك لمحة سريعة 😌
تخيّل معي من منظر إطباقي، أنا عم حضّر من الطاحن باتجاه الملاصق ، وعندي جدارين بالطاحن
هنن دهليزي ولساني، وأنا طالع للحفاف بيتشكل معي قوس معكوس عالجدار الحفافي الدهليزي وبكون أكبر( يعني اكتر انحناء) من القوس المعكوس عالجدار الحفافي اللساني لسببين :
▪️حتى يكون الجدار المينائي الملاصق الدهليزي موازي للمواشير المينائية .
▪️الفرجة بين السنية أكبر من الجهة اللسانية .
رح بضيفلكم صورة للشرح بأول كومنت😁
▪️بعدين بالجدار الملاصق اللي تشكل عندنا نتيجة انو وقفنا قبل الحفاف ، منعمل ميزاب :
منبدأ بالميزاب من الطاحن باتجاه لثوي ( عمودي عالجدار اللبي)
بدو يكون ضمن العاج والمينا ، بحيث يتركلي طبقة رقيقة من المينا ( بين السنبلة والسن المجاور) منسميها ” القُشيرة المينائية ” وظيفتها الأساسية ما تأذي الجدار الملاصق للسن المجاور .
▪️بلغة الأرقام والنظري ؛ الشق بكون ثلثيه بالعاج (0.5-0.6 ملم ) وثلثه بالمينا ( 0.2 ملم ) فهمتوا 👍😁 .
▪️بعد ما خططت هالميزاب ، بمشي فيه ب 3 اتجاهات :
دهليزي ولساني ولثوي وهيييك حتى أوصل للجدار اللثوي ، اللي هو أرضية الحفرة العلبية
⛔ طيب كيف بعرف انو حاجة لهون تحضير بالاتجاه اللثوي ؟!؟
عندنا معطيات أساسية لهالنقطة يلي هيي 😎
▪️عمق النخر ونقطة التماس ..
إذا كان النخر تحت نقطة التماس فالجدار بكون بعد النخر فوراً .
إذا كان النخر فوق نقطة التماس فالجدار بكون تحت نقطة التماس ، والنقطة المثالية هي لما يكون عندي مسافة بين الجدار اللثوي والسطح الملاصق للسن المجاور بمقدار 0.5 ملم 😮💨 .
[ لااا تزعلل🔥#عملياً قصدهم لما بصير الفصل بين الجدار اللثوي والسن المجاور بيدخل فيه رأس المسبر بشكل عمودي 😎 ] .⛔ هلا دور الجدار المحوري [ المساير لمحور السن الطولي ] تتذكروا القشيرة المينائية ؟!؟
▪️لازم الجدار المحوري يكون مساير للسطح الخارجي لهي القشيرة حتى يكون شغلنا تمام التمام وبكامل الأناقة
▪️اضافةً انو الجدار المحوري لازم يكون ضمن العاج بمسافة 0.5 – 0.6 ملم يعني سماكة ثلثين قطر رأس السنبلة
▪️لازم أمن تقارب دهليزي لساني بالحفرة العلبية بحيث ( اذا من منظر ملاصق شفناها ) بتكون متقاربة بالطاحن ومتباعدة باللثوي لزيادة التثبيت
▪️الزاوية الدهليزية الملاصقة واللسانية الملاصقة تشكل مع الترميم زاوية 90 درجة مشان ما تكسّر حواف الأملغم هون
⛔ هلا كيف بدنا نشيل القُشيرة المينائية بعد ما خلصت أغلب تحضيري ؟!؟
▪️ببلش فيها بميزابين عموديين عليها فوق نقطة التماس فبالتالي بروح هاد المينا كونو صار رقيق وضعيف، وبتستعمل مجرفة وبطبق قوة عليه باتجاه الخارج فبيكسر 💪 ..
⛔ طيب وإذا بقي عندي بقايا ؟!؟
▪️بجيب شريط مسندة وبحطّوا بين السنين بحيث احمي السن المجاور أنا ومرتاح ومبسوط ، وإذا صار وكنت مآذي السن المجاور أو كان فيه علامات طبشورية ، بستعمل شرائط سحل وأقماع مطاط حتى حافظ عالسن وشيل هالسطح الشاذ عنو .
▪️بالنهاية إذا كان عندنا مناطق نخرة بشكل أعمق من العمق الأولي للتحضير ( اللي هو ٢ ملم )
▪️بعمل الجدار اللبي كلو على مستواها ❌ ..
▪️بنزل فيها لحالها بشكل بئر [ بسنبلة شاقة او كروية ] ✅ ..
⛔ ممكن نستعين بميازيب تثبيت بالحفرة العلبية، طريقة عملهم كالتالي …
▪️رأس السنبلة المخروطية التنغستين في الزاوية النقطية اللثوية المحورية الدهليزية [ أو اللسانية ] وبشكل عمودي على الزاوية الخطية المحورية الدهليزية[ أو اللسانية] ومنمشي بالسنبلة حتى الزاوية النقطية اللبية المحورية الدهليزية [ او اللسانية ] .
▪️بحيث يتوضع الميزاب بشكل مُنصف للزاوية المحورية الدهليزية[ او اللسانية ] .
▪️أخيراً وليس آخراً يتم شطب الزاوية المحورية اللبية لتأمين سماكة للأملغم وضمان عدم كسر الترميم .
▪️والشطب بشكل مُبسّط، هو إزالة الزاوية، يعني لما بيلتقوا اي جدارين مع بعض رح نحصل على زاوية هي الزاوية لما منكسرها ( منشطبها ) بتصير السطح عندها أوسع ما يكون بس زاوية ، والطريقة سهلة جداً، سنبلة شاقّة او مخروطية منحطها عالزاوية بحيث سطحها الجانبي عمودي على الزاوية، يعني منميّل السنبلة بزاوية ٤٥ درجة ومنمشيها على هالزاوية ف تراااا، بتنشطب 😂 .
⛔ أمـّـا بالنسبة لتحضير الصنف التاني كومبوزيت، فالتحضير بينقسم شكلين :
⚠️ تقلـيدي :
▪️مُشابه لتحضير الأملغم باستثناء بعض الفروقات، حيث بالكومبوزيت مافي داعي لميازيب التثبيت بالحفرة المُلاصقة ( فكروا ليش وجاوبونا 😁)
▪️وفينا نستغني عن الزوايا القائمة بالتحضير .
▪️إضافةً أنو لازم نكون حريصين تكون حواف الحفرة الملاصقة وخاصةً من الجهة اللثوية كلها ميناء لحتى يصير عنا ختم للحواف قدر الإمكان كونو الارتباط للكومبوزيت مع المينا اكبر من العاج وأقوى، وفينا لحتى نزيد مساحة الجدار المينائي اللثوي نعمل شطب بالطريقة اللي حكينا عليها سابقاً .
⚠️ مُعــدّل :
▪️بيتضمن تحضير مناطق النخر فقط، يعني بس إزالة النخر بسنابل ماسيّة كروية أو قمعية طبعاً مُفضّل بالحالات اللي بكون فيها النخر امتدادو بسيط، أما اذا كان النخر واسع فالمفضل هو التحضير التقليدي .
وهـاد كلـشي مبدئيـا عـن الصنـف التـاني 💪👍
نـلتقي ببوسـت الترمـيم 😎🔥
دمتم سالمين أصدقائي ..❤..
ولا تنسوا تخبرونا عن كل استفساراتكم واسئلتكم .
إعداد وتحرير : د. مـصطفى عـبـد القـادر ســرور .
مــــيددوز ~ مـــــصدرك للـــــمعلومات الـــــطبية الــــــموثوقة 🛡.
مواضيع صحة الاسنان والفم