عُدنا والعودُ أَحمدُ ❤️
رح نتابع بـ يلا عالسريري بترميم الصنف التاني ونحكي عن الأملغم والكومبوزيت ..
⛔ بدايةً رح نقسم الموضوع مشان تسهل علينا الأمور لـ :
🔰التبطين .
🔰المشترك بالترميم بين الكومبوزيت والأملغم واللي هو تركيب المسندة .
🔰الخاص بالأملغم والكومبوزيت كل على حدى 😁 .
⛔ الــتـبـطـيــن :
نظرياً الحفر الضحلة ( اللي سماكة العاج -يعني المسافة بين العاج واللب – فيها فوق ال ١.٥ ملم ) فينا نرممها بدون تبطين ،
بس عملياً وبالسريري بالكلية التبطين دائماً تحت حشوة الأملغم ، أما بالنسبة للكومبوزيت فبتكون بالمناطق العميقة فقط( اللي سماكة العاج أقل من ١-٠٥ ملم ) .
كمادة عملية مُستعملة بالتبطين ؛ ثخانة متجانسة من ماءات الكالسيوم سواءً الكيميائي أو الضوئي .
⛔ المشترك بين الأملغم والكمبوزيت :
خلونا نتفق على ترتيب بهي المرحلة حتى نكون أنيقين وما ننسى شي :
1️⃣ الوتد ( خشبي او بلاستيكي) .
2️⃣ تركيب المسندة .
3️⃣ الترميم .
4️⃣ إزالة الوتد .
5️⃣ فك المسندة .
6️⃣ إزالة شريط المسندة .
هاد الترتيب بسهل عليكم الشغل جداً ، طبعاً يُفضل يصير التبطين بعد تركيب المسندة مشان يكون العزل تام
الوتد ؛ متل ما حكينا خشبي أو بلاستيكي ، بكون بمقطع عرضي مُثلّث ، رأس المثلث بكون باتجاه الطاحن وقاعدته عاللثة، ويوضع بالفرجة بين السنية .
بالمُجمل مافي قاعدة عامة بتحكم وضع الوتد او القياس المناسب ، بس لازم نعرف انو الوتد اللي بيدخل بالفرجة بين السنية بشكل مُحكم هو الوتد المُناسب ، وعملياً مندخّل الوتد من الفُرجة الأوسع ( يعني مثلاً بالعلوي بتكون الفُرجة الحنكية أوسع ، بس مانو أمر حتمي ) بالمُختصر ؛ انت سيد الموقف تاج راسي 😎 .
تركيب المسندة ، (وهون حطنا الجّمال 😁)
خلينا نتفق انو في أنواع مساند بالهبل 😅 بس بالكلية عندنا 3 أنواع أساسية منشتغل فيهم :
💢 السيلوئيدية ( وهي بالصنف التالت والرايع ) .
💢 المسندة الكاملة والجزئية نظام Tofflimire .
💢 المسندة المقطعية Sectional matrix .
النوعين التاني والتالت هنن اللي ممكن نشتغل فيهم بالكلية وترتيبهم حسب الأولوية ، يعني ضروري تصير حرّيف tofflimire حتى تشتغل بالمقطعية لهيك تركيزنا حيكون عنها 😎
نظام Tofflimire :
هاد النظام بيتألف من قسمين رئيسين :
• حامل المسندة .
• شرائط المسندة .
وكل وحدة فيهم ( شرائط وحوامل ) الها الكامل والجزئي ، بس فينا نستعمل الكامل مثلاً محل الجزئي وليس العكس ⚠️
⛔ الكاملة :
منستعملها مع حفر ال MOD وبرضو فينا نستعملها مع ال MO وال DO .
حامل المسندة بيتألف من برغي وظيفته تثبيت الشريط عالمسندة و متل عزقة 😁 هي وظفتها تشد شريط المسندة عالسن او ترخيّه والقسم التالت اللي هو مكان تثبيت المسندة ( برأس الحامل ) .
بهالرأس رح نشوف عندنا عروة متل حرف U مشقوقة بالنص ، ركزوا معي شوي هون 🤓 .
فتحة حرف ال U ( هي اللي من فوق بالحرف U ) دوماً باتجاه الميزاب الخدي الدهليزي ( يعني ع طول فاتحة تمها باتجاه الميزاب😂) وحسب جهة السن المُراد ترميمه ، إذا يمين أو يسار او علوي او سفلي بوجّه من اي فتحة من الفتحتين الباقيات ( اللي هنن وجه حرف ال U ) .
شربط المسندة ، بيجي على شكل بكرة بأطوال مختلفة ، وفي منه عريض ورفيع ، عموماً كصنف تاني بدنا نستعمل العريض .
شغلة مُهمة كتير أنو لما بستعمل هالنوع من المساند ، لازم يرتكز رأس المسندة تبع العروة U على نسج سنية سليمة، وبشكل أدق عالزاوية الخطية الدهليزية المُقابلة لحفرة الصنف التاني اذا كانت MO , DO ، وعالجدار الدهليزي اذا كانت MOD ( بس هون مننتبه ما نشد المسندة كتير وخاصةً بحالات الصنف التاني واسعة التهدّم لأني الشد الزائد بطبق قوة عالجدارين الدهليزي واللساني و ممكن لاسمح الله بعيد الشر ينكسر واحد منهم 🥺) .
⛔ الجزئيـة :
منستعملها بشكل خاص بال MO , DO
الحامل عبارة عن شكل حرفين U متعاكسين متقاطعين ، بنقطة التقاطع موجود البرغي تبع شد طرفي المسندة ، وبأحد الطرفين بكون موجود متل ناتئين صغار ( متل أضافير العصفور 😁) منستخدمهم لتثبيت شريط المسندة .
شريط المسندة الجزئية بكون بشكل بيضوي تقريباً ، من تحت بكون الجزء اللي مافيه تعرّج ومن فوق بكون الجزء اللي فيه تعرّج ، الجوانب بتكون مُثقبة ليدخل فيها أضافير العصفور 😂 حسب حجم السن .
هلأ المسندة الجزئية بيختلف موقعها تبعاً للحفرة ، يعنييي ؛
لما بتكون MO منحط جسم المسندة وشريطها من الأنسي ، بينما لما بتكون DO , منحط الجسم من الأنسي والشريط من الوحشي .
⛔ هلأ بالنسبة للترميم :
لا تنس ابداً تكون عازل الأسنان، وبتعرف انو العزل المفضل الحاجز المطاطي، لاني ما بتتخيل الكوارث اللي ممكن يسببها عدم العزل.
وبعدا عنا الغاية الأساسية من وضع المسندة هي بناء المُلاصق وتحويل حفرة من الصنف التاني لصنف أول يسهل ترميمها ، بس بتختلف شوي بين الكومبوزيت والأملغم ..
⛔ الأملـغم :
بعد ما نكون مازجين كبسولة دفعتين أو ٣ دفعات ( حسب حجم التحضير ) منبلش ننقل الأملغم بالمدفع على دفعات للحفرة العلبية وكل دفعة منكثفها عمودياً وجانبياً بشكل جيدجداً وهيك حتى نخلص من الحُفرة العُلبية ونوصل للطاحن ، منعبي الطاحن كمان على دفعات متل ما تعلمنا .
منحاول نترك أملغم زيادة عن الطاحن ب ٠.٥ – ١ ملم ( تقديرياً ، يعني تروك طبقة أملغم رقيقة فوق السن ) هي الطبقة بتعطينا مسافة كافية للنحت .
بعدها منكمش مسبر وبالرأس المنحني تبعه ، منحطه بشكل مائل على شريط المسندة ( بحيث بينزل بين الجدران الخارجية للسن وشريط المسندة) وهيك بمشيه على داير المسندة حتى اكشف سطح السن ويبين معي من وين بدي ابدأ نحت ، بس لازم كتير نبقى حريصين عالحفاف .
بعدها بواسطة منحتة، منستند بجسم رأس المنحتة على الحدبة المُراد نحتها ، ومقدمة رأس المنحتة بتكون على حشوة الأملغم ، بمشي جسم الرأس على النسج السنية للحدبة بتقوم بترسملي مقدمة الرأس مكان التقاء الحدبة مع الميزاب المركزي ، وهيك كل حدبة بعمل نفس الطريقة بشوف انكشفت ملامح السن ، وبعدا بتأبدع يا معلم 😎🔥.
مهم جداً ما نخاف ونتلبك انو مارح نلحق الحشوة وهلأ بتتصلب ، لأني هيك رح تتوتر كتير .
سمّ بالله وخود نفس عميق واشتغل بتفكير ودقة ومسؤولية واتبع الأساسيات وان شاء الله بتشوف حشوتك صارت عالمية
خلينا ما ننسى الصقل ع طول لأني نضافتنا وجماليتنا من جمالية شغلنا🔥والتفاصيل عن هالمرحلة اكتر حكينا عنها بالصنف الأول .
⛔ الكومبوزيت :
يعتبر نوعاً ما أسهل لأني وقتك بإيدك ( إلى حد ما ) بس حساس جداً ، وأي خلل بأي مرحلة بدنا نخرّب شغلنا ، لهيك العزل الجيد والأدوات المناسبة بتعطيك أحسن ترميم .
كالعادة تخريش وبوند متل ما حكينا بالصنف الأول وبعدا منبدأ بالحفرة العُلبية ومنبني جدار ملاصق بواسطة دفعات من الكومبوزيت منحطها عالجدار اللثوي ومنكيفها ومندكها باتجاه شريط المسندة .
منصلّب كل طبقة وهكذا، حتى يصير عندي ارتفاع مقبول للجدار ( يعني حتى اوصل لبعد منطقة التماس بحبّة ) وهون بكفي الحفرة العلبية كلها كومبوزيت مع الدك والتصليب وعلى دفعات صغيرة وبس تحولت الحفرة لصنف أول ، ما بدك توصاية يا قبضاي 😎.
أهم شي ما ننسى نراعي العامل C بترميمات الكومبوزيت ،
( اذا حبيتوا تعرفوا عنو أكتر خبروني بالكومنتات لجاوبكم عليه 🔥😍)
⛔ بعد ما تأكدنا انو الترميم خلص ، وعطانا تصلب أولي ، منمسي بالترتيب التالي :
منشيل الوتد .
منفك شريط المسندة( عن طريق فك البرغي تبع المسندة )
بعدا منشيل شريط المسندة ومنحرره بحركتين ، اول شي باتجاه السطح الملاصق للسن المجاور ( يعني متل كأني عم لفو على السن المجاور ) وبعدا باتجاه طاحن لثوي حتى يطلع ، وهيي أحلى جدار ملاصق بشوفو بحياتي 🔥🔥❤️
⛔ هلأ منتجه للانهاء والتلميع بنفس الطرق اللي حكينا عليها بالصنف الأول ، بالإضافة أنو ممكن نستعمل شرائط السحل على الملاصق بحشوة الكومبوزيت اذا كان عندي شؤوذات .
⛔ ختاماً صديقي العزيز، لا تنسَ فحص الإطباق بورق العض، وأنك تخبر مريضك الجوعان أن فينو ياكل ويشرب فوراً بعد حشوة الكومبوزيت، وبدو ينطر ساعتين إذا رممتلو أملغم، إضافةً انو ممكن يعاني من لمعة بسيطة بالفترة الأولى ، يومين تلاتة وبترجع أمورو سليمة .
خبرونا اذا في شي حابين نشرح عنو أكتر أو أي أسئلة
وبتشوفونا حدّكم ، وكتفنا بكتفكم ..
تبقوا بألف خير ..❤..
إعداد وتحرير : د. مـصطفى عـبـد القـادر ســرور .
مــــيددوز ~ مـــــصدرك للـــــمعلومات الـــــطبية الــــــموثوقة 🛡.
مواضيع صحة الاسنان والفم