رح نحكي اليوم عن سيناريو منشوفو كتير بالعيادات أو بالمشافي:
صبية بالعشرينات أو بالتلاتينات عم يصير عندها نخزات بصدرا، مع خفقة عالقلب وتسرع بيجي وبيروح كل فترة! وهاد الشي عم يسبب قلق كتير للبنت، شو بعمل يا دكتور؟
منعمل تخطيط قلب وايكو قلب للمريضة منلاقي عندا انسدال بالصمام التاجي! منخبر المريضة أنو أعراضها بسبب انسدال التاجي.
هل انسدال التاجي مرض خطير⁉️
هل يسبب انسدال الموت المفاجئ عند الصبايا عنجد⁉️
كيف يتم علاج هاد المرض⁉️
بصراحة انسدال الصمام التاجي هوو أشيع شذوذ خلقي بالقلب على الإطلاق وفيه بتكون أحد شرفات الصمام أعلى من التانية.
في الواقع لا يكون انسدال الصمام التاجي شيء مرضي إلا بوجود قصور الصمام التاجي المرافق، وهاد الشي قليل جداً نشوفو بإيكو القلب أي لا يجب أن نحمل كل ما يحصل مع المريضة على شماعة انسدال التاجي 😅
كان يعتقد سابقاً أن انسدال الصمام التاجي يرتبط مع اضطراب الهلع والموت المفاجئ لكن بينت الدراسات الحديثة أن ذلك غير دقيق ولا يوجد زيادة مهمة بنسبة حدوث الموت المفاجئ عند مرضى انسدال التاجي عن غيرهم.
بحال وجود خفقان وتسرع قلب مرافق ( وهالشي صحيح ووارد كتير) فممكن نعالجو بمركبات بتبطئ القلب وتخفف من التوتر المرافق تدعى حاصرات بيتا (انديرال) وهذه الأدوية آمنة يمكن استخدامها بشكل مديد.
مين بيعاني من هيك أعراض وكيف بيتعامل مع أعراضو خلونا نشوف تجاربكم بالتعليقات
كل الأمنيات للجميع بالعافية 💚
د. سومر شلبي Somar shalaby.
(سماعة حكيم)
Somar Shalaby