🚩 وحش مرعب يلاحق طبيب الأسنان ❗
انكسار الأدوات اللبية ..
مجرد ما يسمع طبيب الأسنان بهالحادثة يلي صارت مع صديقه …
بصير يتذكر لما انكسرت معو هالأداة، وببلش يعرق وأفكار تاخدو وتجيبو ..
🔰 طيب خلينا نحكي شوي عن هالموضوع ونوضحو :
⛔ انكسار الأدوات أثناء المعالجة اللبية ( سحب العصب ) يمكن صاير مع أغلب أطباء الأسنان ويعتبر كابوس لكتير منهم، واللي سببو الأساسي هو زيادة الإجهاد ع هالأدوات !!
⛔ بالاضافة لكتير عوامل بتزيد من إحتمال انكسار الأدوات (متل الاستعمال الزائد والمتكرر أو تطبيقها بقوة زائدة من قبل الطبيب)
يعني أحياناً بكون ناتج عن خطأ من قبل الطبيب.
⚠️ بس لحتى نكون عادلين هاد الاختلاط ممكن يصير مع أي طبيب لأسباب لها علاقة بتشريح السن مثلاً،
فمو دائماً نلقي اللوم عالطبيب 😁
⛔ طيب اذا انكسرت الأداة شو درجة خطورة الموضوع ⁉️
بالحقيقة مو كل انكسار أداة يعني فشل حتمي أو مشكلة لا يمكن حلها وإنذار الحالة بيعتمد على كتير عوامل متل:
(بأي مرحلة انكسرت الأداة، وقديش كانت القناة اللبية نظيفة ومطهرة قبل الانكسار، وحجم هالأداة … الخ)
⚠️ هلق خلينا نأكد عنقطة أنو من حق المريض على الطبيب أنو يتم اعلامو بانكسار الأداة مع شرح كل خيارات المعالجة
⛔ طيب إذا صارت هالحادثة ومشي الحال شو ممكن يساوي الطبيب ⁉️
⚠️ طبعاً مع تطور الأجهزة والتقنيات (أمواج فوق صوتية – موسعات ..) أصبح خيار إزالة الأداة المكسورة أسهل لما يتوفر عندي التكبير و الإضاءة الجيدين بشرط الحذر أثناء استخدام هالتقنيات…
⚠️ وممكن الطبيب يلجأ لتجاوز الأداة bypass في حال ما توفرت القدرة لإزالة هالأداة وبعد ما ينجح بالتجاوز بكمل بتنظيف القناة اللبية بشكل كامل وبحذر…
🔰 ولا بد من ذكر أنو في كتير حالات بتصعب فيا خيارات المعالجة وهون لابد من تحويل الحالة إلى اختصاصي معالجة لبية، يلي ممكن تتوافر عندو تقنيات أكثر تعقيد متل:
(المجهر Microscope أو استعمال تقنيات تصوير متل CBCT بالإضافة للخبرة بالتعامل مع مثل هذه الحالات).
☝🏻وبالنهاية.. منتمنالك طبيبنا العزيز معالجة سنية خالية من انكسار الأدوات… 😌🙏🏻
☝🏻أما بالنسبة ل مريضنا الغالي .. مننصحك دايما تحافظ على هدوءك وما تتوتر بحال خبرك الطبيب بهيك حادثة، لأنو بأسوأ الحالات.. أصبح من الممكن حل هالمشكلة بأيدي الأخصائيين …
تبقوا بخير …♥️
● إعداد وتحرير : د. هاشم الشعار
● المصدر العلمي :
https://bit.ly/3fJnCXL
https://bit.ly/3z23pnC
🚩 اعـتمادُ ” مِنصَّـةِ صِحـَّةِ الـفَم السوريَّـة – MedDose ”
المتخصِّصةُ بنشر الموثوقِ من طبّ الأسنـان و اختصاصاتهِ ومُحاربةِ المُعتقداتِ الطبيـَّة الخاطئـة.
مواضيع صحة الاسنان والفم