كلنا عنّا هاد الرفيق لحاطت تقويم أسنان، واللي من رابع المستحيلات تشوفوه شايلو بحياتكم…!!
ماعلينا من منظر التقويم الجميل 😍 …
بس ياترى بتعرفوا كيف أصحاب أجهزة التقويم لازم يعتنوا بأسنانهم… !؟
🔰 هلق نحنا متل ما منعرف انو أجهزة التقويم فيها تصنع المعجزات لنحصل على رصفة أسنان حلوة ومتناغمة وابتسامة جذّابة
لكن هي الاجهزة ممكن تخلي الحفاظ على فمنا وأسناننا نظيفة أمر صعب احياناً، وهالشي بسبب وجود عدة مكونات بالجهاز التقويمي بيعلق فيها الطعام وبيكون صعب تنظيفها بسهولة وهي المكونات هي :
1️⃣ الحاصرات يلي بيكون شكلها مربع موجود على سطح السن.
2️⃣ الأسلاك
3️⃣ الأطواق ()
🔰 هلق بعض طرق التنظيف الغير فعّالة يمكن تترك الطعام معلق بأسنانك وتقويمك لفترات طويلة…
و هالشي ممكن انو يسبب رائحة الفم الكريهة وتراكم للويحة الجرثومية يلي بدورها بتسبب مشاكل أكبر بالأسنان مثل الآفات النخرية أو التهابات اللثة.
☝🏻ولكن اذا اتبعت نظام تنظيف صارم و فعّال طوال فترة استخدامك للتقويم رح يساعدك انو تتجنب المزيد من علاج الأسنان بمجرد فكيت تقويم الأسنان…
وهلق رح احكيلكن عن شوية وسائل تنظيف لازم تستخدموها إلى جانب فرشاة الأسنان العادية:
1️⃣ الخيط السني
▪️أوّل شي اختار خيط سني مشمّع لان الخيط السني
غير المشمع بينقطع أحياناً بس نستخدموا …
▪️تأكّد من أنو طول قطعة الخيط يلي عم تستخدمها كافية لتمسكها بشكل صحيح بدون ما تنزلق (40) سم تكون كافية
▪️بتحط الخيط تحت السلك الرئيسي للتنظف بين الأسلاك والأسنان…
▪️ بعدين منستخدم الخيط بين الأسنان كالمعتاد …
(كرر هذا لكل سن لتحصل على أفضل النتائج).
2️⃣ فرشاة بين سنية
الفُرَشاة ما بين الأسنان عبارة عن فرشاة أسطوانية صغيرة مصممة لتنزلق وتنظف الفراغات بين الأسنان و الأقواس.
بتمتلك شعيرات جانبية تنبثق لإزالة بقايا الاكل واللويحة بالمناطق الصغيرة يلي بيصعب الوصول إليها بين السلك المقوس والأقواس…
🔰 ونصيحة اخيرة…
أثناء الخضوع لأي نوع من علاجات تقويم الأسنان
لازم تستمر ب فحوصات الأسنان المنتظمة…
حيث يوصى بشدة بتحديد موعد واحد على الأقل كل 6 أشهر لتتجنب أي مشاكل مستقبلية ولتعزيز صحة الفم والاسنان …
منشنوا لاصدقائكم واسألوهم كيف يا ترى بحافظوا على صحة أسنانهم !؟ …😌❤️
● إعداد وتحرير : د. ياسمين ذُبيان
● التدقيق العلمي : د. علي سقر
● المصدر العلمي :
Oral hygiene for the orthodontic patient
🚩 اعـتمادُ ” مِنصَّـةِ صِحـَّةِ الـفَم السوريَّـة – MedDose ”
المتخصِّصةُ بنشر الموثوقِ من طبّ الأسنـان و اختصاصاتهِ ومُحاربةِ المُعتقداتِ الطبيـَّة الخاطئـة.
مواضيع صحة الاسنان والفم