🚩كـل ما يـلزمك مـعرفـته حول بطاقة الأمراض حول السنية ~ يلا عالسريري
هلا بلشنا بالجد اول خطوة رح نخطيها معكم بمادة النسج حول السنية هي التوعية
و البطاقة التشخيصية و التشخيص يلي هنن المفتاح الأساسي للمعالجة الناجحة لهيك ركزوا منيح
1️⃣ البداية بالمعلومات الشخصية عن المريض بداية من اسمه، عمره، عنوانه، جنسه، المهنة، مكان الإقامة ورقم الهاتف
2️⃣ التاريخ الطبي لنعرف شو عند المريض من امراض عامة وشو كان عنده سابقا شو عم يستخدم ادوية وضروري ننتبه اذا عنده حساسية تجاه دواء معين وأخيرا التدخين منقيس كمية التدخين اذا المريض مدخن وعدد سنوات التدخين اذا كان تارك التدخين
3️⃣ التاريخ السني لنعرف المعالجات السابقة وتاثيرها على الخطة اللي رح نعتمدها
4️⃣ الشكوى الرئيسية
5️⃣ المشعرات :
و المشعر هو تحويل حالة نوعية لحالة كمية قابلة للقياس على شكل رقم نقدر من خلال نشخص الحالة بدرجات
🛑 ح نبدأ معكن اليوم بـ مشعر اللويحة السنية ومتل ما منعرف اللويحة هي المسبب الرئيسي للامراض حول السنية لهيك الها الأولوية
بيشمل هالمشعر 4 درجات :
▪️الدرجة 0 : لا توجد لويحة حول الحافة اللثوية
▪️الدرجة 1: تراكم خفيف منكتشفه بالمسبر فقط لما منمرره على السن
▪️الدرجة 2 : تراكم معتدل منشوفه بالعين المجردة
▪️الدرجة 3 : تراكم شديد على سطح السن واللثة والمسافات بين السنية
⛔ كيف منشتغل هالمشعر ؟
⚠️ نجفف السن بالهواء مشان الرؤية الواضحة ومنستعمل المسبر والمراية و منفحص أربعة سطوح (الدهليزية الوحشية –الدهليزية –الدهليزية الانسي – اللسانية )
⚠️ منسجل قيم السطوح الأربعة لكل سن وتقسم على أربعة لنحسب قيمة السن الواحد بعدين منسجله على المخطط بالمربع المناسب
وبعد ما نخلص لكل الاسنان منقسم ناتج جمعهن على عدد الاسنان المفحوصة وهيك منحصل على قيمة مشعر اللويحة للمريض ومنحطها على يسار المخطط
⛔ أي أسنان لازم نفحص ؟
أسنان رامفيود المرجعية Ramfjord index teeth
وهي الاسنان رقم 44-32-36-24-12-16
⛔ شو منعمل في حال كان سن من هي الاسنان مفقود؟
⚠️ منعوض عنه بسن تانية جاره من نفس الطبيعة والنوع
⚠️ اما في حال غياب السن الأساسي والبديل ما منعوض عنن بشي
🛑 مشعر التهاب اللثة :
▪️الدرجة 0 : اللثة سليمة وطبيعية
▪️الدرجة 1 : التهاب لثة بسيط منشوفه على شكل تغير باللون بسيط او نزف عند السبر
▪️الدرجة 2 : التهاب لثة متوسط احمرار وضاح لمعان و نزف بالسبر او الضغط
▪️الدرجة 3 : التهاب لثة شديد و اهم ما يميزيها النزف العفوي
⚠️ منحسبه بنفس الطريقة لمشعر اللويحة على نفس السطوح و الاسنان بالمسبر
🛑 مشعر الضخامة اللثوية اله ثلاث درجات :
▪️الدرجة 1 : خفيفة بتكون اقل من ثلث سطح مع او بدون ضخامة الحليمات بين السنية المجاورة
▪️الدرجة 2 : متوسطة تكون حتى ثلث سطح تاج السن مع ضخامة الحليمات السنية المجاورة
▪️الدرجة 3 : شديدة تشاهد ضخامة شديدة تغطي سطوح الاسنان والمسافات الملاصقة
🛑 مشعر عمق السبر حول السني :
⚠️ السبر بيكون من الحافة اللثوية الحرة الى قعر الجيب و يعتبر الميزاب اللثوي طبيعي اذا كان بعمق من 0-3 ملم
⚠️ طريقة السبر الصحيحة:
🦷للسطوح الدهليزية واللسانية : السبر بشكل مواز للمحور الطولي للسن
🦷للسطوح الملاصقة : بشكل مائل قليلا مباشرة اسفل مناطق التماس بزاوية 10-15 درجة باتجاه منتصف السطح الملاصق مع تجنب السبر بشكل عمودي او المبالغة بالامالة .
🛑 المشعر خاص بالاسنان المتعددة الجذور ( مشعر مفترق الجذور) :
▪️الدرجة 0: لا توجد إصابة
▪️الدرجة 1 : اندخال المسبر اللثوي افقيا حتى 3 ملم
▪️الدرجة 2 : اندخاله اكثر من 3 ملم دون خروجه من الطرف التاني
▪️الدرجة 3 : اندخاله وخروجه من الطرف التاني للسن وهذا الشي يعني تخرب كامل بمنطقة المفترق
⚠️ طريقة السبر
ندخل المسبر في الجيب بشكل عمودي حتى نصل الى منطقة المفترق
نميل المسبر بشكل افقي ونحاول إدخاله لمنطقة المفترق محددين درجة الإصابة
اذا لم يدخل المسبر يعني لا يوجد إصابة
🛑 مشعر الحركة السنية tooth mobility TM
▪️الدرجة 0 : حركة طبيعية فيزيولوجية لا تميو بالعين المجردة
▪️الدرجة 1 : حركة خفيفة يمكن الإحساس بها
▪️الدرجة 2 : حركة متوسطة بالاتجاه الدهليزي اللساني او الانسي الوحشي ويمكن رؤيتها بالعين المجردة
▪️الدرجة 3 : حركة شديدة في جميع الاتجاهات مع حركة بالاتجاه العمودي
⚠️ طريقة فحص حركة السن الصحيحة :
توضع أداة معدنية متل قبضة المراية من الجهة الدهيليزية وراحة اصبع الفاحص من الجهة اللسانية ويدفع السن ليتحرك بجميع الاتجاهات
🔰 وهيك منكون خبرناكن عن أول جزء بالبطاقة، خلوكن معنا لنكفي بالجزء التاني
كل التوفيق❤️
إعداد وتحرير : د. ريام محمد النجار
مــــيددوز ~ مـــــصدرك للـــــمعلومات الـــــطبية الــــــموثوقة 🛡
مواضيع صحة الاسنان والفم