// بوست تعريفي عن هالكلية وكل تفصيلاااااا
.
من تجربة المحامي محمد عهد القاضي ، ماجستير بقسم القانون التجاري
.
بالبداية ننصحكم بالانضمام للغروب الخاص بالطلاب المستجدين لكلية الحقوق ..
// حقوق سوريتنا .. دفعة 2023 //
الرابط بيصلك بعد ال⚫️⚫️
اولاً – ك مفاضلة كتير منكن صار بيعرف بيطلعلوا حقوق ولا لا ، يعني مافي داعي نحكي بهالنقطة ، بس اي سؤال حول هالموضوع يفوت عالغروب الخاص بطلاب الحقوق والرابط بالبوست
.
ثانياً – شو بندرس بالكلية !!
خلال 4 سنين .. بتشوفو 90 مقرر دراسي
46 مقرر إجباريات ،
12 مقرر بتختارو منن 6 ، هنن إنكليزي او فرنسي
35 مقرر بتختارو منن 4 بس ، هدول بالسنة رابعة
بالمجمل انت يعني بدك تدرس 56 مادة ، كل فصل 7 مواد
وسهلين مو صعبين
، من الاخر لا تخافو الفرع اسهل مما عم يقلولكن
.
ثالثاً – يلي بخاف من الحفظ ..
الفرع تبعنا مو شرط تحفظ ل تنجح ، بالعكس اذا ما فهمت مالح تنجح ابدا
يعني الفهم اهم من البصم
انا ك طالب بحياتي ما حفظت ولا كلمة وبرفع كل موادي وما حملت منن شي ابدا ، وانا كنت بكلوريا علمي وبقرا المحاضرات قراءة بس بدون حفظ اي شي والحمد الله وضعي تمام
.
طيب كيف بدّي افهم نص قانوني !!
بالحقوق بندرس روح القاعدة يلي موجودة بالقانون وشو معناها ، وماااا بنحفظا نفسا حرفياً
وكتير من اسئلة الامتحانات هية امثلة من الواقع ، يعني واحد ضرب والتاني سرق والتالت باع بيت او سيارة ، وهكذا
.
رابعاً – شو هية مجالات العمل بعد التخرج !!
1- التطوع ك ضابط بالجيش او الشرطة
2- اتباع سلك القضاء
3- العمل ك موظف في دوائر الدولة
4- التدرب والعمل ك محامي
5- مستشار قانوني مع الشركات والبنوك
6- التدريس في الكلية
.
خامساً – الحقوق ك كلية الها اهمية كبيرة بكل جامعات العالم ، وك كلية موجودة منذ نشأة جامعة دمشق
كلية الحقوق الها فرقة حزبية خاصة فيها هية وكلية العلوم السياسية ، وباقي الكليات كل كم كلية الهن فرقة حزبية
.
والحقوق الها بنائين فخمين جداً بجامعة دمشق ..
بناء المدرجات منشأ حديثاً وهو احلا بناء بجامعة دمشق ومجهز كامل بالتكييف المركزي
البناء القديم ، هون بتحس حالك عايش بالتراث الفخم
هالشي طبعاً كتير بأثر لان هالفترة هية احلا ايام حياتك وكتير نفسيتك بتفرق اذا لح تنبسط فين وتحضر وانت مبسوط ولا لا
.
سادساً – الدوام غير ضروري بالكلية
بس انت عندك مثلا 7 مواد بالفصل ، دائماً في 2 او 3 منن اذا حضرتن كتير بتفرق معك وبتفهمن وبتحس حالك مالك المادة ، وبضل الحضور غير إلزامي يعني مافي تفقد وهالقصص
.
،، مدة الفصل الدراسي عنا فقط 10 أسابيع ، يعني شهرين ونص بس وشهر بريح وبعدا امتحانات وبيجي الفصل التاني
،، مدة الامتحانات بتكون حوالي 5 أسابيع بكل فصل
باقي ايام السنة عطلة ✋🏻
يعني بكل بساطة فيك تشتغل اي شي وتدرس شي تاني وبدون ما يأثر ع دراستك بالحقوق أبداً ، بقا مالح تسرق منك ٤ سنين وتنسى حالك فين
.
سابعاً – ك جو عنا الكلية كتير حلو ، كل سنة في حوالي ال4000-3000 طالب جديد
يعني بتحسن تلاقي منن الرفقات يلي بدك ياهن ومن جوك ،
وكمان في طلاب من كل المحافظات والأجواء ومن كل الأديان والطوائف ، وهاد احلا شي بالكلية ❤
.
بنصحكن كتير تنضمو للغروب يلي لح يصلكن برسالة ، هو خاص فيكن ، ولح تستفادو فيه كتير
تعرفو فيه اكتر عالكلية وشوفو كل التفصيل ، لا تخجلو من السؤال مشان ما تندمو بعدين ،
وهالغروب للطلاب وفِي مين مختصين بساعدوكن ..
نادوا لولادكن او رفقاتكن او أخواتكن يشوفو البوست ويفوتو عالغروب ويستفادو وما يتفاجئو بشي بعدين ..
موفقين ❤
