هي بوست كيف تسجلوا عالمفاضلة بالتفصيل الممل من وقت تطلعوا من البيت لوقت ترجعوا بطريقة حلوة ورائعة والذي منو🔥
المهم البوست رح يكون طويل لأنو فيه كل التفاصيل والذي منو ورح تستفادوا طبعا🤌
المهم قبل بيوم من التسجيل عالمفاضلة بتفكر شو هي رغباتك اللي بتسجلها وبتكتبهن عورقة وبتتفق مع رفقاتك تنزلوا سوا وتتلاقوا عباب الجامعة وبتضبط المنبه عالساعة 7 الصبح وبتنام….
تاني يوم برن المنبه عالساعة 7 الصبح بتطفيه وبترجع تفيق عالساعة 9 الصبح بتحط الهوية وصورة عن شهادة البكالوريا (مو الأساسية) وبتاخد معك شي خمس ست تالاف ليرة (وأكتر إذا نازل حدا معك يسجلك مشان تعزمو) وبتنطلق للجامعة….
ووقت توصل بتشوف رفقاتك وبتتخانق معهم ليش تأخرت وبتروحوا تشتروا الأوراق المطلوبة…
قبل ما تفوت عالجامعة بكون في شي الف بني ادم واقف وعم يقول مفااضلاااات مفااضلات مفااااضلاات (مافي داعي تقلد الصوت أنت) ، بتقلو شو سعرها مع الطوابع بقلك قدي بتعطيه حقها 💰 وبتفوت عالجامعة 🚶♂️
ملاحظة هامة: فيك تكتب رغباتك بالبيت مع الرموز ونشرنا الرموز عقناة التيلجرام التابعة ل وهيك وقت توصل لهنيك بس بتشتري طوابع وبتصور هويتك وبس 🚶♂️
والأدبي نفس الشي تماماااا بس الفرق انو مافي رغبات ولا شي بس بتحددوا شو الرغبة اللي بدكن تسجلوها وبتنطلقوا بتجيبوا طوابعو وبتصوروا الهوية وبس 🔥
منكفي مع العلمي
المهم بتعبي رغباتك (بحقلك تسجل أقل شي رغبة وأكتر شي 35 رغبة وإذا بدك تسجل منح كليات طبية بصيروا ٤٥ رغبة) وبتروح تصور هويتك وبوجهك عمكان ما بسجلوا للطلاب رغباتهن (غرف الحواسيب)…
بتفوت لجوا وبتقعد جنب الموظف أول شي بتنقلو رقم الاكتتاب ولغة التفاضل بتطلع التفاصيل عندو كلها وانت وقتها بس بتنقلو العنوان ورقم الهاتف….
وبعدين بتصير تنقلو بس رموز الرغبات وهو وقت بحط الرمز وبيطلع شو الفرع المقابل ألو وهييك….
ووقت تخلص بتعطيه صورة هوية وبيعطيك هو نسختين تلصق عليهن الطوابع (ما في داعي قلكن طريقة التلصيق الشهيرة) بعد ما تلصق عليهن الطوابع بتوقع عليهن وبيختمولك ياهن وبتضل نسخة معك بتفوت عليها عالجامعة ونسخة معهن…
هي باختصار
1️⃣ طيب ياضياء أنا بدي سجل موازي موازي تحضيري شوفي شي زيادة؟
نفس الطريقة تماما بس قبل ما تنزل عالجامعة بتروح عشي مصرف عقاري وبتدفع 100 الف طبعا اذا ما طلعلك تحضيري برجعولك ياهن واذا طلعلك بيخصموه من سعر الموازي….
2️⃣طيب سؤال تاني ياضياء إذا الفرع بدو مسابقة أو اختبار فينا نسجلو؟
مافيك تسجلو لبعد ما تطلع نتيجة المسابقة أو الاختبار
3️⃣ سؤال تالت مفاضلة ذوي الشهداء شو بدهن ؟
نفس الأوراق المطلوبة فوق بس في زيادة وثيقة استشهادة من مكتب شؤون الشهداء
4️⃣ سؤال رابع أيمت وقت التسجيل؟
من 4/ 9 حتى 25/ 9
5️⃣ فيني سجل هندسة معلوماتية بحلب وأنا بدمشق أو أي فرع تاني؟
طبعا فيك بس بتحط رمز الفرع بالمحافظة اللي بدك ياها
6️⃣ سؤال أخير وين مراكز التسجيل ورموز الرغبات؟
بتلاقوها بالتعليقات
ضياء ناصيف
Deaa Naseef