دكتورة والله بفرشي أسناني بعد كل وجبة و قبل مانام و أول ما فيق وماعم لاقي حل لريحة تمي 😷…
الله يخليكِ ماعم أعرف شو اعمل راح مصروفي ع الزاهي و المسكة ☹️ ..
✅ أنت عم تعاني من بَخْر الفم أو بما يعرف علمياً
بِ halitosis
خلينا نتفق أنو في كتير أسباب بعيدة عن المشاكل الفموية هيه يلي بتسبب رائحة الفم الكريهة أو البَخْر الفموي ومنها:
بعض الأدوية المسببة لجفاف الفم ( متل مضادات الهيستامين و مضادات الاكتئاب و الكورتيكوستيروئيدات الاستنشاقية)
أو الأطعمة أو مشاكل صحية تنفسية أو هضمية…
لهيك لازم نعرف نشخص السبب لنتوجه لعلاج صحيح يخلصك من هي المشكلة و هون منعرض الأسباب
و منبدأ من:
🔰 داخل الفم
1️⃣ تسوس الأسنان بسبب تراكم فضلات الطعام بأماكن صعب فرشاة الأسنان توصللها لهيك لازم نعالج النخور أول بأول…
2️⃣ إلتهاب اللّثة بسببلنا تراجع باللثة وهاد يعني فراغات أو جيوب بمصطلح أدق وهيه مكان محبب للبكتيريا يلي بتسببلنا رائحة فم غير محببة لهيك لازم تراجع أخصائي اللثة ليعمل تنظيف مناسب…
3️⃣ تعويضات سنية سيئة أو بما يعرف بالعامية بالتلبيسات عالمدى البعيد إذا ما كانت ملتصقة بالأسنان بشكل صحيح بتسببلنا تراكم لفضلات الطعام وهاد يعني بخر فم كمان…
🔰أما عن الأسباب خارج فموية
1️⃣ منروح لأمراض الجهاز التنفسي
متل إلتهاب الحلق أو الشعب الهوائية أو إحتقان الجيوب الأنفية 🤧 و كمان البلغم من مسببات رائحة الفم الكريهة
أما معدياً و معوياً ف ببعض الحالات إذا كنت بتعاني من إمساك مزمن أو إلتهاب الأمعاء ف كمان هاد سبب أساسي بالمشكلة
وهون منتخلص منها بالتزامن مع العلاج من هي الأمراض
2️⃣ بعض الأمراض المزمنة بتسبب البخر الفموي
متل السكري و الفشل الكلوي أو الكبد و بعض السرطانات
3️⃣ هاد شي لازم تعرفه منيح انو اذا كنت من الناس المدخنين 🚭 ف أنت مارح تخلص من هي المشكلة لهيك خود قرار بالابتعاد عن التدخين اذا كنت حابب تتضلك قريب من الناس الي بتحبها 🤭😁
والتدخين يا عزيزي متلو متل الأطعمة الي بتسببلك هالمشكلة متل الثوم و البصل و البهارات
4️⃣ و آخر سبب للناس الي بتنام و فمها مفتوح ليلا ف حتماً رح تعاني من مشكلة رائحة الفم الصباحية ليه!
لأنو جفاف الفم من اللعاب الي يعتبر مطهر طبيعي لفمك هو السبب 🤤
والله يا دكتورة صار بدها صفنة و ترتيبة تانية ..
ومن ميددوز دمتم بخير ♥️
● إعداد وتحرير :د. نور محمد شمسو
● المصدر العلمي :https://bit.ly/38zP46q
🚩 اعـتمادُ ” مِنصَّـةِ صِحـَّةِ الـفَم السوريَّـة – MedDose ”
المتخصِّصةُ بنشر الموثوقِ من طبّ الأسنـان و اختصاصاتهِ ومُحاربةِ المُعتقداتِ الطبيـَّة الخاطئـة .
مواضيع صحة الاسنان والفم