عندي تابلت Asus انضربت فيه جكت الشحن
يعني العطل واضح وصريح وما بدو معلمية
رغم اني بغير جكات شحن لمعظم الاجهزة من صوتيات وبور بانك وغيرها
الا انه هل مرة ما بدي عذب حالي وقلت عطي الخباز خبزو ولو اكلك نصو ☺️
حملت حالي ورحت على برج دمشق وطبعا هنيك المصلحين محترفين وكل يوم بمر على راسن مية جهاز
اول واحد رفض يشتغل فيه قال لانه التابلت بعقد وهلق منكون بالجكة منصير بغير شغلات 😖
اخدو التاني من ايدو قلو هاد ايسوس مو صيني قلي انا بصلحو بس بكلفك ٢٥ الف 😳
انا اجدتني الصدمة قلتلو ما بدا هل قد هي جكة شحن قعد يتملعن انه هاد ايسوس وصعب كتير ومن هل حكي 😏
رحت عند غيرو المهم طلب ١٥ الف قلت ماشي الحال اشتغل
صرت اتفرج من تم ساكت وعملت حالي غشيم 🤐
فتح الجهاز باضفيرو 😅 قلت يا اخي معلم وايدو خفيفة
فك البورد وسندها تحت الكوشوك قلنا والله فكرة احلا من الملزمة لشو مالها طعمة هيك اسرع
مسك الافو وعمل شوية فحوصات قلت والله لمد راسي وشوف الافو تبعه اكيد ماركة معروفة وتقيل لانو هاد للموبايل وبدو دقة 🤔
واذ بتفاجئ عم يستخدم بينسة امبير الصفرا نوعية رديئة ودقتها عدم 😳
لاااع هيييك كتير بس خليني ساكت واتفرج 😑
فك الجكة القديمة بكاوي الهوا وجاب وحدة غيرا
حاول يركبها ما زبطت معه 😏
رجع القديمة وبلش يلحمها 😱
هون ما عاد فيني اسكت قلتلو هي القديمة قلي اي ما بأثر ما فيها شي بس بدها لحام
قلتلو بس بتكون مهرية من جواتها وتماساتها رايحين قال لاااءا ما فيها شي
طيب تعرضت لحرارة كتير حاجتها
زورني انه خلص حاجة تنق 🤨
قلت خليني شوف النتيجة مع هل محترف 😒
جاب الكاوي العادي وبدو يأكد اللحام بس الكاوي راسو وسخ ما لقط معه جاب هل مفك وقعد يجلخ راس الكاوي فيه 😂
لك التعن ابوه للراس يازلمة الكاوي يلي عندي بستخدمه للاغراض العامة وما بمسحه غير بسفنجة او محرمة كيف للموبااايل😓
المهم مع فلاكس وبرحمة الله نلحمت معه 🥱
جربها وقلي امورك تمام وطبقلي الجهاز طبعا مسك الكميرا بايدو وصارت كلا فلاكس وبصمات
قلتلو مسحها ع القليلة قلي تكرم مسحها ورجع مسكها بايدو وحط بصمتو عليها انو شو استفدنا 😓
هلق للامانة اشتغلت الجكة
بس الجهاز ما اشتغل 😂
قلت بجوز بدو شحن وخليتو ع الشحن لتاني يوم وما اشتغل 😤
قلت خلاااص بلا خباز بلا خبزو بلا بطيخ لح افتحو انا وشوف شو القصة
بيطلع الافندي نسيان يركب فلاتة كبسة البور مشان هيك ما عم يشعل 🤬
شو رايكم بهيك معلم صيانة موباااايلات 😅
عن النبي عليه الصلاة والسلام
ان الله يحب اذا عمل احدكم عملا ان يتقنه
اسف للاطالة بس حبيت شارك تجربة لن تعاد ابدا
معك حق وصايرة معي والله
كلن خريجين مركز المؤمون الدولي لصيانة الموبايلات
لا خباز ولا فران نسبة. 70%وماني ظالم حدا هدول متعدين عالمصلحة