بتكون قاعد بأمان الله ورواق الصبح عم تسمع فيروز
فجأة…بوووم انفجار ..بتركض بسرعة عالبرندا لااا تعتل هم هاد جاركم ابو محمد عم يعطس بس😑
شو هو العطاس؟؟
خروج الهواء بطريقة مفاجأة من الأنف أو الفم..مع تغميض العيون..
في ناس بتعطس مرة وحدة بس وناس بتعطس أربع خمس مرات ورا بعض..ليش؟؟
بطمنك..أنت بتعطس لأن في مهيج بالمخاطية للأنف أو الحلق..
أي شو يعني؟؟ يعني طالما ما راح المهيج من أول مرة رح تضل تعطس تعطس حتى يروح🙂
شو أسبابه؟؟
من أهم الأسباب هو التهاب الانف التحسسي
شو هاد؟ أكيد بفترة الربيع في كتير ناس بتتحسس من حبات الطلع من ريحة الزهور
في ناس بتتحسس من وبر الحيوانات..من الغبرة من كتير محسسات
طيب هالمحسسات شو بتعمل؟😈
بالمخاطية الأنفية في أعصاب كتير حساسة..هالحبات الطلع مثلاً بتجي متل اللئيمة وبتهيج عالأعصاب..الجسم شو بيعمل ليتخلص من غلاظتها؟؟ عطسة عطسة حتى تطلع من المخاطية💙
كيف منعالج هالحالة؟؟
ببساطة مناخد مضادات هيستامين
شو بيفيدوا؟
الهيستامين من الوسائط اللي بتتهيج وبتسبب حساسية..
بتجي هالمضادات بتمنع إطلاق الهيستامين وهيك منخفف عطس واعراض حساسية متل سيلان الانف وهالقصص💙
كمان الفلفل الأسود.. العطور.. الدخان..وكتير قصص ممكن تسبب حساسية
سؤال عم تفكرو فيه؟؟ ليش أحياناً لما نتطلع بالشمس منعطس؟؟🌞
ببساطة..اتصال بين العينين والأنف بيسبب منعكس بيهيج الأعصاب وكانو في محسس جوا الأنف ف منعطس
اه صح..وفي مركز عطاس موجود بالدماغ..هاد اللي بيرسل الإشارة لنعطس..بيعطي أمر بإغلاق العين..الحلق..تقلص كتير قوي لعضلات جدار الصدر…وبووووم
منتمنى تستعملوا كاتم صوت لما تعطسوا😑
متل العادة…أنا د. ماري نمنوم💙
(سماعة حكيم)
Marie Namnoom