تعذبت نطفة البابا وطلعت لعند بويضة الماما واندمجت فيها بالمكان المعتاد .. البوق
بس حضرتك تنحّت ولسبب ما ، ما كلفت خاطرك تنزل على بيتك الأصلي .. تركت الرحم بدفاه وأمانو ووسعو وكل سبل العيش يلي فيه وقررت تعشش بمكانك وتكبر بمكانك !
طيب عضلية البوق رقيقة وأنت عم تكبر ويوسعلك المكان في ألم فظيع عم تشعر فيه أمك !
وبلكي تمزق هالمكان الرقيق يلي مو مجهز حتى يتحملك ؟
مو رح تعمل نزف لأمك .. نزف متعب ومرهق ممكن يوصلها لفقدان الوعي وخطر الوفاة لو ما تدبر بسرعة !
هاد ولا شي قدام لو فكرت للحظة تعشش بمكان تاني متل مبيض أو عنق رحم أو بطن .. اختلاطات أعقد كمان وخطر على حياة الماما أكبر 💔
بتجي للحقيقة ؟
مو أنت السبب .. الأسباب مختلفة يا حبيبي بس مبدأها تقريباً واحد فكلشي بيضرب البوق من حيث حركتو أو من نفوذيتو بيأهبّ أنو هالبيضة الملقحة ما تنزل لمكانها ..
أي عمل جراحي حوضي ممكن يعمل التصاقات وهالالتصاقات ممكن تأثر على هالبوق وتعمل خلل بحركيتو وبنفس الآلية هيك بيعمل مرض مزمن اسمو الداء الحوضي الالتهابي كمان التصاقات ..
اللولب يلي فيه بروجسترون وحبوب منع الحمل يلي فيها بروجسترون بس كمان بتعمل خلل بحركية البوق ..
اسم حالتك يا حبيبي طبياً حمل هاجر أو ectopic pregnancy .. بالتشخيص ببين مع الدكتور أنو الأم منقطع طمثها بدليل في حمل بس حجم رحمها طبيعي !
بيعمل إيكو ما في كيس حمل بالرحم ويمكن يبين الجنين بالبوق !
وإن كان بدو يتأكد الطبيب أكتر بفوت بتنظير بطن وببين معو وقتها وممكن كمان يعاير هرمون اسمو BHCG وعلى حسب معيارو بشوف ..
العلاج حسب حالة الماما من الدوا للجراحة بس أكيد أم واصلة بحالة صدمة نزفية فبدها فتح بطن إسعافي واستئصال المشكلة من محلها ..
ممكن ترجع الأم بعد الحمل الهاجر تحمل ويهاجر الباشا ؟
ممكن اي طبعاً وسوابق حمل هاجر هيي عامل خطر لحمل هاجر جديد بس نسبة أنو تحمل حمل طبيعي كبيرة بتوصل لل60 بالمية فالتوكل على الله ❤️
وعهالسيرة في حالة مميزة صارت بسوريا بزمن الحرب أنو أم حامل صار معها حمل هاجر بالبطن .. كانت بمنطقة محاصرة ما فيها شافت لا مشفى ولا دكتور فكبر هالجنين ووصل لتمام الحمل وولد !
بحالة غريبة ونادرة خلقت هالأم من رحم الألم أمل ! ❤️
كنت معكم سَماح صالح محمد ♥️
مصدر المعلومات العلمية :
مرجع النسائية والتوليد في كلية الطب البشري في جامعة دمشق.
(سماعة حكيم)
Samah Saleh Mohammad