عُظماء في طبِّ الأسنان.
الأستـاذ الـدكتور محمـود عبـد الحـق.
نـائب عميد كليـة طـب الأسنـان لشـؤون الطـلاب والشـؤون الإداريـة في “جامعة دمشق”؛ ورئيس الرابطة السوريِّة لطب الفم الوقائي ومكافحة العدوى.
وفي لقائنا نحنُ الميددوز معه لمعرفة المزيد عن حياته المهنية وللإجابة عن استفسارات الطلاب…
◾»» لمحة عن اختصاصك الجامعي وليش اخترته؟
◽» اختصاص طب الفم هو اختصاص أنا بعتبره شامل، اختصاص مُتعاون أو مشترك مع مختلف الاختصاصات…
من ناحية تانية، قسم طب الفم بعالج الأمراض التي لا يمكن علاجها ولا بقسم من الأقسام.
وللأسف، نحن كطلاب بعد ما نتخرج؛ منهمل ناحية أمراض الفم لناحية شو ؟!
لناحية أنو والله أنا بدي زرع؛ بدي تجميل؛ بدي الفينير؛
بدي النواحي يلي بتجبلي الدخل المادي .
مثلاً وهاد يلي بشوفو بعيادتي مرضى الآفات المحتملة الخباثة، حقيقة بروحوا لعند طبيب اثنين وتلاتة، وبالأخير لبيجوا لعند الاختصاصي بطب الفم…!!
قسم طب الفم ليس فقط أمراض الأغشية المخاطية، وانتو كطلاب بتعرفوا هالشي، بيهتم بالوقاية وبالتشخيص الشعاعي، وبأمراض الفم وكان تابع النا الطب الشرعي يلي حالياً يتبع لقسم النسج والتشريح المرضي، بيهتم بالصحة العامة وبالطب الوقائي، بيهتم بكتير من الأمور.
ويعتبر من الأقسام الضخمة في كلية طب الأسنان، ممكن نعتبره الجندي المجهول حقيقة بكل الكليات على مستوى سوريا.
أنا رجعت بالسنة 1993 من الإيفاد وتعينت بالسنة 1996، وبالسنة 1997 صرت رئيس قسم مباشرةً، دخلت القسم ولا يوجد به ولا كتاب !!
يوجد فيه نوطات فقط، وفيه أستاذ واحد كان يدرِّس،
اساله أستاذ أين الكتاب المصدر لمادة الطب الوقائي يُجيبني والله ما بعرف مين عم يدرسه،طيب الصحة العامة وينها !! والله ما بعرف مين عم يدرسها.
فأنا كرئيس قسم تابعت هاد الأمر حقيقة وحاولنا نسترجع كل المواد للقسم الأم يلي هي تابعة إله…
النقطة الثانية: ساويت كتب بالقسم، أول كتاب بلشت فيه بالسنة يلي تعينت فيها عام 1997 وساويته مع الدكتور عاطف نداف يلي كان عم يدرس مادة الصحة العامة.
الطب الوقائي ساويته مباشرة بالسنة يلي بعدها مع الدكتور محمد تيناوي بشكل مشترك، بعد منها حاولت إحداث درجة الماجستير وأحدثناها في السنة التي تليها وبعدها افتتحنا الماجستير وأصبح لدينا طلاب ماجستير.
عيّنا أساتذةً، وبعدها أحدثت درجة الدكتوراة وافتتحناها كالقسم الوحيد في سوريا الذي يمنح درجة الدكتوراه باختصاص طب الفم.
◾»» طيب بهالمسيرة يلي مريت فيها شو هيي الصعوبات يلي واجهتك ؟!
◽» حقيقةً، الصعوبات كانت بموضوع تأمين الأجهزة سابقاً وتأمين المواد لطلاب الدراسات العليا؛ حتى السنة ما قبل الماضية كانت هذه الصعوبات موجودة، لكن حالياً الأستاذ الدكتور محمد يسار عابدين فيني قلكم عاطينا الضوء الأخضر، أنو اطلبو ولن يتوقف أي شيئ.
◾»» نصيحة للطلاب !!
◽» دائماً اشتغلوا ضمن أخلاقيات المهنة وآدابها…
يعني أنا لما بشتغل ضمن الأمر هاد معناه أنا بعرف كيف بدي أتعامل مع المريض، كيف بدي أهتم بالمريض، كيف بدي استجوب المريض، وضع خطة العلاج، وما ننسى التعاون الأخلاقي مع الزملاء.
وفي بيت شعر بدي قوله غنته أم كلثوم ودائماً بركز عليه بأول محاضراتي:
(صلاحُ أمرك للأخلاق مرجعهُ فقوِّم النفسَ بالأخلاقِ تستقمُ).
فدائماً الأخلاق والأخلاقيات يلي بدك تشتغل عليها هي الأساس، فالأخلاقيات هي الإنفكشن كونترول، الأخلاقيات هي نجاح الأندو وسائر المعالجات السنية.
◾»» في سؤالنا له عن الإجراءات المتبعة في هذا الفصل من قبل كلية طب الأسنان جامعة دمشق؛ بشأن التخفيف من وطأة “جائــ.ـحة كـ.ورون.ـا” كـ( العمل بنظام أسبوع دوام أسبوع عطلة وغيرها)…
◽» قال : الدوام رح يكون بشكل مستمر، وإلى الآن مافي أي تعليمات أو توجيهات جديدة؛ بس على كل حال الأمر يعود للطالب دوماً في اتباع التوجيهات باستخدام وسائل الوقاية يلي هيي الكمامة والنضارات وغيرها؛ وأضاف بأن الكلية رح تعمل عقد مع شركة تعقيم للقيام بإجراءات التعقيم بشكل مستمر ضمن الكلية (العيادات، المخابر بشكل دوري).
◾»» وبشأن تخفيض عدد الأعمال السريرية هذا الفصل :
◽» رح جاوبك من موقعي ولا سيما من قسم المداواة، مارح يصير تخفيض للأعمال السريرية، لأن تخفيض الأعمال السريرية هو تخفيض لمستوى الطالب.
بالعكس بدل ما أنو خفض الأعمال السريرية أهتم بوسائل السيطرة على الانتان، وتوزيع عادل للطلاب على الكراسي، ونحن وجهنا بمجلس الكلية لهاد الأمر أنو يكون فيي عدالة بالتوزيع وبإشراف طبعاً رؤساء الأقسام.
◾»» متل ما بتعرف عنا بعيادة اللبية جهاز أشعة وجهاز تحميض واحد؛ ومنصف نحن طوابير بتوصل لبرا العيادة أحياناً بس لنصور نحن طلاب الفئة، هل من الممكن أنو يكون في تركيب لجهاز أشعة تاني، حالياً أو لقدام ؟!
◽» موضوع أجهزة الأشعة بشكل عام موضوع قديم جديد ومتجدد؛ نحن ممكن نطلب من المكتب الهندسي يعمل دراسة لإمكانية احداث غرفة تانية لأنه بتعرف بدو يكون مرصص هاد المكان…
النقطة التانية نحن بدنا نحاول نتحول من سوائل التحميض للديجتال، فعندكم في سينسور باللبية، وبالأطفال وبطب الفم وبالمتحركة فيي سينسور جديد وصل؛ بس هاد ما بيغطي حاجات الطلاب وخاصة باللبية؛ عيادة الأشعة تحت موجودة وعيادة الأشعة عم نشتغل عليها حالياً؛ طلبنا من المكتب الهندسي إعادة تأهيل كامل إلها …
فيها 6 أجهزة ؛ 5 شغالة وواحد حالياً عم يتصلح، طيب بدها شوية اهتمام من قبل الطلاب كمان؛ رأس الجهاز لما عم اتركه بعدما صور عم يضرب بالحيط، وعم ينكسر قمع الأشعة، ماعم نقدر نلاقي قمع لنركبه؛ الجهاز سعره ملايين فبدها اهتمام من قبل الطلاب ضمن هاد المجال.
النقطة التالتة موضوع سوائل التحميض: فيي هلق دراسة عم نساويها أنو نخلص من سوائل التحميض، ماعد بدي سوائل تحميض بدي شي اسمه التصوير غير المباشر…
إذا بتعرفو التصوير الديجتال هوي نوعين: النوع يلي هو سينسور موجود بالعيادات والتصوير غير المباشر يلي بيحتاج لجهاز اسمه الماسح وممكن عبره نعمل شبكة ربط مستقبلاً، بس نحن بحاجة للتعاون مع ال IT ضمن هاد المجال.
◾»» كم من الوقت بدو ليتفعل هاد الشي ضمن الكلية تبعنا؟
◽» طلبنا من المكتب الهندسي تسعير الأجهزة هي، ونحن عم نشتغل عليها لنحاول نجيبها؛ فخلال السنتين القادمين ممكن يتحقق هاد الشي 100 % عأرض الواقع.
◾»» في ظل هاد الغلاء الكبير؛ يا ترى ممكن يصير توزيع للطلاب مواد تعتبر أساسية ؟!
◽» وصل مواد أساسية وهلق عنا بالمستودع (50) كيس أو أكثر ألجينات ،والمطاط رح يتم تأمينه قريباً.
◽» عم نشتغل كمان بالكلية على أنو يصير فيي تعاون مع معهد التعويضات السنية الموجود عنا، فيي عنا مكان موجود مواجه المدرج الأول تقريباً؛ بهالمنطقة عم نحاول نساويها مخبر للطلاب، مافي داعي يطلعو لبرا، يعني منه طلاب التعويضات بيستفيدوا ونحن منستفيد منوفر وقت وجهد عالطلاب.
◽» عم نحاول يصير في عيادة جديدة وقريباً ستُبصر النور مكان المكتبة ، التجميل يلي عم ينشغل باللبية رح ينزل لتحت.
◾»» دكتور شو نصيحتك للطلاب المُقبلين ع المرحلة السريرية ؟!
◽» أهم نقطة هيي الإنصات والتطبيق الجيّد لتوجيهات المشرفين فيما يتعلق بالجانب العملي والسيطرة على الإنتان.
◾»» رأيكم باللقاح المضاد لكـ.ورون.ـا؛ بالنسبة للطلاب وخاصةً بالمرحلة السريرية ؟!
◽» هلق موضوع اللـ.قاح في عليه جدل عالمي حتى الآن حول الفائدة تبعه، مافيني قلك 100% فعال ومافيني قلك غير فعال؛ ولكن هل هل لازم ياخده الطالب ؟!
نعم لازم ياخد بهدف التخفيف من أعراضه في حال الإصابة لاسمح الله، فأنا بوجه الطلاب ياخدوه، وقبل لقاح كورونا بوجه الطلاب ياخدو لقـ.ـاح التهاب الكـ.ـبد B، ولكن حقيقةً لحتى الآن ما تأمن بس عم نشتغل عالموضوع لأنه بتعرفوا هالأمور عن طريق وزارة الصحة حصراً.
◾»» شو رأيك دكتور بمقولتنا انو السريري أسهل من المخبري ؟!
◽» المخبري بيبقى الطالب ببداياته حقيقة، يعني بيتعامل مع سن أكريل سن غير طبيعي غير حي. فممكن يتلبك شوي بموضوع تحضير صنف أول تاني تالت الخ…
السريري بيختلف شوي أنو الحفرة النخرية هي يلي بتمشيك مو أنت يلي بدك تمشي ، بدك تمشي مع النخر، أحيانا بيطلع معك تحضير مو داخل ضمن تصنيف بلاك أو معروف شو هو!!
أحياناً بتضطر تحفر آبار مشان ما نعمل تحضير جائر، وين النخر منشيله فقط بهل نقطة منبطنها وخلص.
◾»» الدفعة يلي تخرجت شو نصيحتك الها، هل رح تختلف الحياة السريرية والواقع المهني بعد الجامعة عن الحياة ضمن الجامعة ؟
◽» مافي طالب يتخرج من كلية طب الأسنان بيمتلك جميع المهارات بنفس السوية، إلّا ما يكون عنده نجاح بنقطة معينة ونقص في أخرى، فأنا بقول دائماً بعد التخرُّج يبدأ المشوار فطب الأسنان مهنة متطورة بسرعة واستمرار، من ناحية المواد السنية ومن ناحية الأجهزة والتقنيات، لذلك حضور المؤتمرات أمر هام جداً، اتباع الدورات هو أمر هام أيضاً.
فاعمل على تطوير نفسك، واشتغل على مبدأ التعليم المستمر ولا تكن منغلقاً فتُنسى.
◾»» شفنا عم ينزل على موقع الكلية كل يوم، كل يوم أنو فيي مفاجأة، وحكى العميد أنو هيي أكتر من مفاجأة، فينا نعرف لمحة عنها!!
◽» المفاجأة هي مرتبطة مع المؤتمر يلي بدو يصير بمدرج الجامعة ، ورح يكون في معرض كبير حقيقة بقاعة رضا سعيد، ورح يكون حقيقة من المؤتمرات الرائدة على مستوى الوطن العربي لأنه فيه مشاركين من مختلف الدول العربية، خلينا نشوف غيرنا شو عندهم أفكار وخلينا نطلع عالمدارس المختلفة.
◾»» شو المقولة أو الحكمة من خلال سنين الدراسة والعمل تبعكم حبيتها وبتحب توجهها للطلاب ؟!
◽» منختم كمان، بقول لطلابنا:
قوا أنفسكم ومرضاكم أمراضاً لا يُحمد عقباها أحياناً.
●»» باقي تفاصيل اللقاء ضمن التعليقات… ❤️🔥
مواضيع صحة الاسنان والفم