كتير منشوف بطاريات مكتوب عليها 1С أو 3C
اللي خطرلو يسأل شو هالحرف أكيد عرف أنو هاد معدل شحن وتفريغ البطارية
طيب شو دخلو بالبطارية؟
عادة أي بطارية منقول سعتها واحد سي 1C، يعني إذا البطارية مشحونة بالكامل، وسعتها 1 أمبير ساعي، فلازم تعطي واحد أمبير ل مدة ساعة كاملة
نفس البطارية السابقة اذا فرغناها على 0.5C فلازم تقدم 500 ميللي أمبير لمدة ساعتين
طيب وبلكي 2C؟
يعني نفس البطارية بتعطيك أمبيرين ل مدة نص ساعة بس “وأقل حتى كفي قراي”
وعليه نبني مايلي: الرقم اللي قبل الحرف سي بيقلك كم ساعة التفريغ، يعني اذا الكتابة
0.2C يعني بطاريتك بتفرغ ع خمس ساعات
اي وأنا استفدت كدا إيه؟
أيوااا، اذا فرغت بطاريتك بتيار تنين سي او تلاتة سي ف انت عم تقصر عمرها، والقدرة المخباية جواتها عم تكون أقل فيما لو فرغتها بتيارات أصغر
عموماً البطارية الحامضية بينصح بتفريغها بتيار 0.05C أو على عشرين ساعة!!
طبعاً بظرف التقنين والتفريغ الجائر ماحدا بيطلق هالشي ولهيك منلاقي انو عمر البطاريات كتير قصير
الخلاصة:
اللي بيتابعنا بيعرف انو وقت حدا يطلب رأينا ببطارية منسألو شو الحمل عندك وبالساعة كم أمبير بدك، لأنو بناء عجوابو مننصحو ببطارية بتناسب التفريغ السريع متل بطاريات الـ AGM ولكن بعمر أقصر نسبياً من بطارية الجل، أو إذا عندو سحب قليل فمننصحو ببطارية جل، وهكذا..
لحظة لحظة حبيب، شفت بطاريات مكتوب عليها C10 وC20 شو هدول؟
أيوا، قسم الرقم اللي على يمين الحرف سي علة واحد، بيصيروا كمايلي:
C10 –> 0.1C
C20 –> 0.05C
يعني أول بطارية مصممة لتفرغ على عشر ساعات، التانية مصممة لتفرغ على عشرين ساعة، والنوعين السابقات هنن صراحة المستخدمين بنظم الطاقة الشمسية
مع تحيات فريق سايبرترون سوريا، والفيتامين سي، ومعدل الشحن والتفريغ
سايبرترون سايبرفيو طاقة بطارية
استاذ يعني اذا عندي حمل 4 امبير على 220 فولت على فرض كفاءة الانفرتر 100% والنظام 24 فولت دخل راح يسحب من البطاريات 36.6 امبير ولنفرض 40 امبير مع الضياعات يعني بهذه الحالة اذا استخدم بطاريات 12 فولت و200 امبير وc10 احتاج الى 4 بطاريات بربط توازي وتوالي حتى يصبح التفريغ على 10 ساعات صح حسابي؟ طيب وتيار البدء للاحمال يقصر من عمر البطارية لو تتحمله.
وشكرا جزيلا على التوضيح وعلى المعلومات الي تقدموها باستمرار