كل الناس بتحسدن عالحب اللي عايشينو كانت تنطر نزلتو من قطعتو

كل الناس بتحسدن عالحب اللي عايشينو كانت تنطر نزلتو من قطعتو كتير انا شخصيا ما كنت بعرفن غير بالشكل والشب من ضيعة قريبة عضيعتي عصفصافة طرطوس كنت تابع حساباتن عالفيس بوك وبكتير مواقف وبوستات كنت حس انو كل يوم هني سوى عم يكون فرحتو بتوازي فرحة عرس
من كم يوم عرفت انو هو نازل بالصدفة وشفت اكتر من بوست وصور وهني مع بعض قلت بيني وبين حالي والله لازم يتزوجوا اذا صورن بالحالة الطبيعية هيك باين الحب فيابالعرس كيف؟ كلمة عابرة حكيتا
اليوم رحت عم ناوب متل العادة بمنظومة الاسعاف والطوارئ بطرطوس بتحكينا من اول ما منوصل محطة الاسعاف انو في تشييع وفاة عمنطقة الصفصافة استغربت انا مو سمعان انا ابن المنطقة طلعنا عالمشفى العسكري وهون بتكون الصدمة اللي بدا وقت لحتى التفكير يستوعبا الوفاة اللي بدنا نشيعا هو الشب مبارح بالليل وهو عالحاجز بتجي سيارة انتر بتضربو وبيتوفى حطينا النعش بالسيارة وحالة عدم استيعاب مسيطرة عليي وصلنا عالضيعة وهون المشهد اللي رح يبقى مطبوع بمخيلة الكل ناس المنطقة كلا بالتشييع وخطيبتو منظرا لحالو بينكتب عنو روايات صرت فكر بصورن صرت فكر انو من يومين عم قول كيف رح يكونو صور عرسن وطلعت عم شوف الصور اللي قدامي
الله يرحمو ويصبر كل محبينو

حنّوا على بعض العمر لحظة

يوميات مسعف
الممرض المسعف حسين نزها

(سماعة حكيم)