مسألة الحساب الكيميائي (مسألة السطرين)

كتيير منسمع ب : مسألة الحساب الكيميائي (مسألة السطرين😨)
هي المسألة يلي اغلب طلاب صف التامن والتاسع عندن عقدة منها.. وبتضل مرافقة هالطلاب لحتى يطلعو من البكالوريا وا حسرتاه 😭
بيجي بورقة الفحص هيك مسألة وبيقول الطالب : شو هي؟ مسألة سطرين؟ 🙂حسبي الله ونعم الوكيل فيهن 🙂 مصرّين يرسبونا 🙄 متحططين علينا اصلا 🙂🙄..
اي لا عيني لا طول بالك 😂.. هي عبارة عن خطوات بسيطة متى ما فهمتا وحفظتا وضعك بالسليم وبتصير انت بتدور ع هالمسألة دوارة لتاخد علامتها 💪🔥
🔴شرح خطوات حل مسألة السطرين :
بدايةً من اسمها للمسألة.. انا عندي معادلة كيميائية ورح حط تحتها سطرين..
👆سطر أول حيكون( لكِ سيدتي )
✌️وسطر تاني حيكون( خاص بالمسألة يعني بحط فيه المعاليم والمجاهيل)
هلأ أول شي لازم اعرف انو في عندي شي اسمو مرجع بالمسألة.. شو يعني مرجع؟ يعني هو يلي عطاني عليه معلومة بأول المسألة.. هاد المرجع برجعلو دائما وبجري عمليات الضرب و القسمة عليه.. 💪
(المرجع كمان الو سطر 1 وسطر 2) وهو يلي بيكون عندو
بالسطر الاول رقم وبالتاني رقم.. يعني ماعندو مجهول بالسطر التاني.. 😍
منجي للسطر الأول لاعرف بما انو هالسطر الي فأنا شو لازم حط فيه؟ تمام رح قلك انو ع حسب طلبات المسألة انت رح تعبي هالسطر.. 👍
طلبات المسألة الثابتة يا بيجو كلن او اثنين منهن :
1️⃣بيقلي احسب كتلة المادة كذا : 🙋‍♀️
بحطلو السطر (1) : بحسب فيه الكتلة المولية للمادة يلي بدو ياني احسبلو كتلتها × عدد المولات.. وبحط قدامها واحدة الكتلة (g)
بجي للسطر (2) : بما انو قلي احسب كتلة، فمجهولي هو الكتلة يلي رمزها m وواحدتها (g).. يعني بحط بهاد السطر m(g)
(لازم ننتبه لشغلة انو الواحدة بالسطر الاول لاااازم تكون نفسا الواحدة بالسطر التاني) واذا بتحط غير هيك ياويلك من الله 👌🙂😂 يعني.. حطيت بالسطر الثاني واحدة g بالسطر الاول لازم تكون الواحدة نفسا g.. حطيت بالسطر الثاني واحدة mol لازم يكون بالسطر الأول نفسا mol.. تمام؟
هلا بعمل عملية ضرب طرفين بوسطين لهدول السطرين مع المرجع وبتطلع معي الكتلة 😍🥳
2️⃣احسب عدد مولات المادة كذا : 🙋‍♀️
هاد يعتبر اسهل طلب😍
السطر (1) : بحط فيه الرقم يلي بيكون موجود قبل هالمادة يلي بدو ياني احسبلو عدد مولاتا.. وبحط قداما واحدته mol واذا ماكان عندي رقم بحط واااحد 1 مو صفر 🙂 لانو لو كان صفر معناتا انا ماعندي مركب اصلا..
السطر (2) : بما انو مجهولي هو عدد مولات فرمزه n وواحدته (mol)..
فبحط n (mol)
وبعمل ضرب طرفين بوسطين مع المرجع🔥
3️⃣ احسب حجم المادة كذا مقاساً بالشرطين النظاميين :🙋‍♀️
السطر (1) : بما انو شرطين نظاميين ف رح حط الشرط يلي لازم كون حافظتو.. يلي هو الرقم 22.4 ×عدد المولات وبما انو حجم فالواحدة حتكون (L)
السطر (2) : مجهولي هو الحجم.. رمزه V وواحدتو (L) يعني بكتب V (L)
وبضرب طرفين بوسطين مع المرجع وخالصين🔥🤩
(لاحظ انو انا بكل طلب داااااائماً عم بضرب بعدد المولات) عُلِمْ؟

إعداد الآنسة : رغد الدهنة..
يلي عندو رفقات عندن عقدة من هالمسألة جيبوهن عالبوست ليفكّوها😂.. ويلي عندو أي سؤال وبدو يصحح حلّه بالمسألتين الموجودين بالصور يحطهن بالتعليقات.. الآنسة رح تكون معكن وتجاوبكن ع اسئلتكن..💪❤️

لمتابعة دفتر التفوق كاملاً يمكنك طلبه من معهد آسيا بالبرامكة.. او من المكتبة الأندلسية بالحلبوني هاتف (٢٢٣٥٥٦٧) 😊👍

✅ طريقة حساب الكتلة المولية ببوست قادم ان شاء الله..