مــيددوز كــن أنــت المُـــسعف كيف تتصرف في الموقف

🔴» مــيددوز ~ كــن أنــت المُـــسعف

✨» كيف تتصرف في الموقف التالي ؟!

✔شخص تعرض لبتر كلي ليده اليمنى بسبب أداة حادة ، كان النزف غزير وأخبرك أنه يشعر بالألم الشديد و البرد
ولا يوجد علبة إسعافات أولية في موقع الحادث !
✔- ما هي الإسعافات الأولية التي يجب أن تقدمها للمصاب ؟
✔- كيف ستتعامل مع العضو المبتور ؟

✅ الجواب :

قبل ما نشرح خطوات الإسعاف بالتفصيل رح نخبركم إنو كل حدا فينا وارد جداً ينحط بهاد الموقف وبتصرف صحيح قادر ينقذ المريض من الموت !

لهيك رح نكون معكم يومياً خطوة بخطوة ، لنتعلم الإسعافات الأولية بشكل صحيح ❤

هالمرة رح نبدأ بتصحيح الأخطاء يلي وردت كرمال تتذكروها منيح :

🔴 أول خطوة لازم نقوم فيها بهالحالة هيي الاتصال بالإسعاف ومن ثم البدء بالإسعافات الأولية للمصاب .

🔴 المريض خبرنا إنو عم يشعر بالبرد ، بالتالي هاد دليل على دخولو بحالة صدمة
وخطورة الصدمة لا تقل أهمية عن خطوة النزيف الحاصل بالتالي أنا لازم اتدخل لحل المشكلتين وامنع تدهور حالة المريض .

🔴 العضور المبتور ممنوع وضعه بتماس مع الثلج بشكل مباشر ؛ لأنو هالشي ممكن يأدي لتنخر أنسجة العضو .

🔴 يمنع فك الرباط الضاغط بعد وضعه .

وهلق صار فينا نحكي عن خطوات الإسعاف الصحيح للحالة :

◾أولاً لازم اتأكد من أمان المكان الموجود فيه أنا والمصاب ، واتصل مع الإسعاف وخبرن الحالة بدقة .

◾بدي طمأن المصاب وحاول هديه وخليه مستجيب معي ، ممكن نستخدم عبارات متل لاتخاف انا رح ساعدك وطلبت الإسعاف و أنت رح تكون منيح .

ممنوع تتلبك وتخاف ، كلما كنت هادء و واثق من نفسك كلما قدرت تسعفو بطريقة أفضل وأسرع

◾بمثالنا مافي علبة إسعافات أولية ، لذلك بدي دور على قطعة قماش نضيفة حاول وقف النزف فيها ، ولما تبتل القطعة بالدم ممنوع شيلها وحط وحدة تانية وإنما بحط عدة قطع فوق بعض ( ممكن استعمال الثياب بأسوأ الحالات )

◾في حال كان النزف غزير هون بدي انتقل لتطبيق الرباط الضاغط بهدف تقليل خسارة الدم ، بربط عصابة فوق موقع البتر بحوالي 5-10cm وبسجل على العصابة وقت الربط بدقة
مثلاً : 11:43 صباحاً

⛔ وممنوع بعد ما اربط العصابة ارجع فكها تحت أي سبب لأنو ممكن عرض المريض لحالة فشل كلوي !

◾المصاب خبرني إنو بردان بالتالي هي علامة لحدوث صدمة والمفروض هون إني غطيه بأي شي متوفر لحتى حافظ على حرارة جسمو ، في حال كان ماعم يعاني من ضيق بالتنفس بخليه يستلقي على الأرض وبرفع القدمين بشكل بسيط ( ممكن وضع اي جسم صلب تحت الكعب )

◾بعد التأكد من إنو المصاب صاحي ومستجيب معي بنتقل للإهتمام بالعضو المبتور

بغسل العضو بمحلول فيزيولوجي ( ماء وملح كلوريد الصوديوم )
وإن ما كان متوفر ممكن اغسلو بالماء فقط ولفو بقطعة قماشية نظيفة وحطو بكيس

وبعدين بحط هاد الكيس بعلبة أو كيس فيه تلج وفي حال ما توفر التلج بكتفي بالإجراءات السابقة لكن هون بدي كون أسرع بتسليم العضو المبتور للأطباء

وتذكر إنو لازم اكتب على الكيس : اسم المريض ، اسم العضو المبتور .

⚠️ تنويه : قد ما كانت أذية العضو كبيرة وشو ماكان العضو المفروض إني ارسله على المشفى مع المريض ، لأنو قرار إمكانية إعادة العضو أو عدمها بحددوه أطباء الجراحة والتجميل .

◾لازم ابقى مع المصاب لحين قدوم الإسعاف وبهاد الوقت بكون عم راقب حالتو وعلاماته الحياتية ( رح نحكي عنها بالتفصيل لاحقاً )
وطبعاً محافظ على هدوئي وهدوئه .

خطوات بسيطة ممكن أي شخص يقوم فيها ، قادرة تنقذ حياة انسان
لا تستهتر فيها وكون دائماً جاهز لتكون أنت المسعف ❤

ميددوز إسعاف أولي

مــــيددوز ~ مـــــصدرك للـــــمعلومات الـــــطبية الــــــموثوقة 🛡

(ميددوز)