بعد سوداوية النظام الرأسمالي، كل شركة هدفها الأوحد هي انها تكبر وتتوسع، بدون مراعاة لأي حقوق عليها تجاه المجتمع والأفراد، دايسة على كل القيم والمبادئ، الشركات معندهاش أي مشاكل انها تبيعك للي يدفع أكتر!
ووسط إنهيار معنى الخصوصية، بيظهر بصيص أمل بيوعد بالخصوصية الكاملة، وبيحافظ على معلوماتك وأسرارك بشكل محمي، وده بالظبط اللي هنتكلم عنه النهاردة، خليني أعرفكم على نظام التشغيل اللي عمرك ما سمعت عنه، الـCalyxOS.
سيبك بقى من المقدمة الدراماتيكية دي وخلينا نتكلم بشكل فعلي عن ايه هو الـCalyxOS، النظام اللي بيوعد بحماية أكبر لبياناتك ويحافظ عليها ضد السرقة، بيديلك كل الـOptions اللي تقدر من خلالها تحافظ على خصوصيتك بشكل ممتاز جدًا
بدايةً، النظام ده مبني على Android بحكم انه Open Source، فـ كل التطبيقات اللي بتشتغل على الـAndroid عادي هتشتغل على الـCalyxOS لأنهم في الحقيقة حاجة واحدة!
وبالنسبة للـGMS أو حزمة خدمات جوجل، فـ انت مش هتفقد القدرة على استخدامهم اطلاقًا، من أشهر المشاريع الـOpen Source المعروفة في عالم الـGeeks هو الـmicroG
وببساطة لو ماتعرفش ايه الـModule ده، فـ هو بيسمحلك باستخدام تطبيقات جوجل بدون ما تسجل إيميل وبدون ما جوجل تعرف عنك أي حاجة، فـ تقدر تسخدم الـYouTube والـGmail والـMaps وكل خدمات جوجل وتسجل إيميلك كمان لو حبيت، وجوجل ماتقدرش تتعرف عليك!
النظام هنا مش بس بيسمحلك باستخدام برامج جوجل بحرية مع الحفاظ على خصوصيتك، كمان النظام فيه Firewall بيسمحلك تتحكم في استخدام النت على الموبايل بتاعك وتعرف الداتا بتتبعت فين وتروح لمين.
الـCalyxOS بيبقى مثبت عليه بشكل افتراضي VPN مجاني بالكامل، وتقدر تستخدم الـCloudflare DNS وتزيف معلومات تصفحك بالنسبة للمواقع كلها، ده غير انه بييجي مثبت عليه أشهر متصفح ومحرك بحث للناس اللي بتدور على خصوصيتهم، DuckDuckGo!
مش بس كدة، التطبيق الأساسي للمكالمات هو Signal! أفضل برنامج شات من ناحية الحماية والحفاظ على الخصوصية، ومن خلال الـDailer بتاع النظام تقدر تعرف إذا كانت المكالمة مُراقبة ولا لأ وبيقولك هل المحادثة دي Private ولا في حد بيتجسس عليك.
وبالنسبة للتطبيقات مش هتغلب، انت عندك الـF-Droid كمتجر ممكن تنزل من خلاله التطبيقات، وعندك Aurora Store اللي يعتبر Clone من Google Play Store! تقدر تنزل من خلاله أي برنامج على Google Play ولكن بدون ما تسجل الأكونت بتاعك بشكل فعلي.
بالمناسبة، CalyxOS مش بيقدم حاجة جديدة أو مبهرة، في الواقع هو معملش أي حاجة جديدة غير انه خلط كل طرق الحماية والحفاظ على الخصوصية في الخلاط وحطهوملك في نظام تشغيل واحد، نظام تشغيل مجاني وOpen Source تقدر تشوف الكود بتاعه وتنزله على موبايلك في أي وقت
الحقيقة مش في أي وقت أوي يعني، لأنه حتى الأن غير مدعوم الا على أجهزة Google Pixel والـXiaomi Mi A2، ولكن واحدة واحدة بيدعموا موبايلات بشكل أكبر والمجتمع بتاعهم متوقع إنه يكبر خلال الفترة اللي جاية.
وزي ما عودتك، مفيش حاجة في الدنيا مالهاش عيوب، الـCalyxOS فيه Bugs رخمة، حاطط على نفسه Restrictions كتيرة عشان يقدر يحافظ على خصوصيتك، وفي النهاية انت بتخرج برة الـEco System بتاع جوجل عشان تحافظ على خصوصيتك بأكبر قدر ممكن!
متنساش في الكومنتات تقولي، هل تضحي بالتناغم اللي وصله الـAndroid دلوقتي مع تطبيقات Google للحصول على بيئة أمنة بتسمحلك بالحفاظ على خصوصيتك ومعلوماتك؟ ولا شايفها ضريبة كبيرة على مجرد خصوصية؟ شاركني برأيك في الكومنتات.
بس كدة، ده كان الموضوع ببساطة.
سلام ❤
الجينيص
الجينيص