تبص امبارح كدة تلاقي Google بتعلن عن عيلة الـGoogle Pixel 6 الجديدة، مفيش تفاصيل كتير ولكن خلاص تصميم المطب ده بقى رسمي ومؤكد، ولكن الأهم بقى واللي جاي أكلمك عنه النهاردة هو الـSoC الجديدة كليًا من Google نفسها! وأيوة التسريبات صحيحة والـTensor chipset هتشوف النور مع عيلة الـPixel 6.
في البوست هنا مش ناوي أتكلم عن توقعات حوالين أداء الـSoC دي، لأن الحقيقة Google مأعلنتش عن تفاصيل كفاية أصلًا! أنا جاي أتكلم عن Apple والـM1 Chipset، واخد بالك انت؟
خليني أشرحلك
أبل هي اللي بتعمل السوفتوير، سواء بقى الـiOS أو الـMacOS أو أي سوفتوير عامةً على أي منتج بتاعها، وفي نفس الوقت هي اللي بتصمم الهاردوير بالكامل، الشاشة بتتصنع عند Samsung أو BEO ولكن بمواصفات خاصة بأبل، الـSoC (زي الـM1) بتتصنع عند Samsung وTSMC بس برضه بمواصفات خاصة بأبل، وهكذا
المنتج اللي بتشتريه من أبل، أبل عندها اشراف شبه كامل على كل مللي فيه، وده اللي بيديلنا في النهاية جهاز محترم مواصفاته على الورق مش أقوى حاجة، ولكن كتجربة فعلية بيقدم “أفضل تجربة” على معظم الجوانب.
طيب ايه علاقة ده بالإطلاق بتاع Google؟ بسيطة
دلوقتي مين اللي بيعمل الـAndroid؟ أيوة صح Google، ومين اللي بيصنع الـPixel؟ صح برضه هي هي Google، مفيش حاجة لفتت نظرك؟ قصة Apple فوق دي، مش حاسس بتشابه شوية؟
ببساطة Google دلوقتي اللي عندها الـPixel، الـChromebook وأجهزة تانية كتير، كمان عندها الـSoC الخاصة بيها، اللي ببساطة تقدر تحطها حرفيًا في كل منتجاتها، وبالسوفتوير بتاعها برضه، بالخدمات بتاعتها برضه، وبالعكس بقى خدمات Google أنضف ميت مرة من خدمات Apple، زي الـGmail والـChrome والـYouTube وغيرهم
حاليًا المنافس اللي عنده فرصة قوية فعلًا قصاد Apple هو Google
الـTensor chipset مش لازم تدي أفضل أداء وأعلى أرقام، المطلوب منها تدي تناغم قوي بين السوفتوير والهاردوير، بالمناسبة، تجربة Google Pixel 5 ممتازة مع انه بييجي بمعالج متوسط Snapdragon 765G، مابالك بمعالج رائد ومن جوجل نفسها؟
الـChromebook، اللي بالمناسبة جوجل بقالها فترة بتحاول تـInvest فيه، أينعم هي حتى الأن محاولات فاشلة، ولكن النظام نفسه مبقاش مجرد Browser وخلاص، حاليًا فيه Apps وبيدعم تشغيل تطبيقات الـAndroid، فـ تخيل معايا كدة الـChromebook بالـTensor Chipset نسخة أعلى للاستخدام المكتبي مثلًا، حاجة ماتقلش في عظمتها عن عظمة الـMacbook والـMicrosoft surface!
طبعًا دي في النهاية توقعات، جوجل مأعلنتش غير عن استخدامها للـTensor chipset في الـPixel 6 الجديد، ولكن الفرصة دي استغلالها هيكون ممتاز سواء على Google، وعلى المستخدم المُحب لتجربة الـEco System.
معلش البوست طويل، بشكرك جدًا انك قريت لحد هنا، لو مختلف معايا ممكن تكتبلي ونتناقش سوا في الكومنتات، ولو عجبك البوست ومتفق مع رأيي ممكن تعمل لايك وتشيره لأصحابك، بس كدة.
سلام ❤
الجينيص
الجينيص