يوووه قال دكتورة توليد قال ما شغلتك غير اكبسي وخدي نفس اك

👶🏻 يوووه قال دكتورة توليد قال 😏 ما شغلتك غير اكبسي وخدي نفس اكبسي وخدي نفس !
يعني بتمناكِ شي مرة بالعمر تشجعي الجنين ما أنا يلي عم ولّد حالي أنا وأمي مو أمي لحالها فلشو الظلم ؟

👶🏻 حان وقت نقول الحقائق يا دكتورة 😌
فمن وقت ما منبلش نستعد للولادة .. مين بيقلب وبنزل راسو لتحت ؟ أنا 🤫
مين يلي بدور راسو ليناسب قطر حوض الأم بالمضيق العلوي ، القطر المعترض ؟ أنا وهاد يلي بتسموه أنتوا الدوران الداخلي .
مين يلي بيكركش حالو ليدق دقنو بصدرو حتى أنزل بأصغر أقطار راسي ؟ أنا 😌
مين يلي بيرجع بدور حتى يقدر يمرق من قطر حوض أمو بالمضيق السفلي ، القطر الأمامي الخلفي ؟ أنا
ومين يلي بمجرد نزل أكبر قطر براسو بيقعد هيك على ارتفاق العانة تبع أمو و بيرجع بدور عكس دورانو الداخلي حتى يرجع يقدر يطلّع كتفو وباقي حالو ؟ أنا طبعاً 😏

👶🏻 ويعني أساساً يلي بساعدني عكل هدول كبسات ماما وتقليعات الرحم 😝 مو أنتِ دكتورة أفندي ومع أنو ما حدا بقلي شو لازم أعمل .. أنا لحالي بعرف ، تخيلي !
وفوق هاد كلو بس أطلع حتى مشيمتي ماما بتطلعها بلا منيتك 🤭

👶🏻 بتعرفي ليش أنا مسامحك ومع هيك بعترف بفضلك ؟
لأنو لو صارت أي مشكلة أو تتنيحة مني أو تغيير بخطة النزول أنتِ بتكوني بالمرصاد ❤️

ومع هيك لازم ماما وكل الماميات والبابيات والدنيا كلها تعرف قديه سبحان الله العظيم وقديه مذهل أني لسا عمري ثواني وبعمل كل هاد !
عظمة الخلق معجزة .. معجزة !

حبيبي يا ماما والله ما حدا بيتعب قدك ولازم بعد هال كبسي وخدي نفس نقوم أنا وجماعة المولد ومساعدينو نعمل حفلة ويقعدوا يغنولنا ويصفقولنا أنو نجحنا وعملنا كويس 😍

بحبك الك وللدكتورة معلش ❤️

كنت معكم سَماح صالح محمد ♥️

(سماعة حكيم)