👶🏼 صارت عمري 3 شهور صرت بشوف أصابع أيدي ورجلي وبتحكم فيهن وصرت هلق بقدر أعمل تمرين الصاعقة الجميل دادي شطة بطة 😂😍 جربي وقفيني وأيديك تحت باطي وشوفي كيف بضغط عالأرض 😌
👶🏼 بهالعمر هاد بسكرو كل الجور براسي وبتحسيه كبير كتير لراسي مو بس بالحجم وبالفعل كمان 🤭 لأني بهالعمر صرت بقدر كركر حكي معك لغة أطفال ما رح تفهميها بس رح تحسي أنو لعوبتك يلي هيي أنا عم تحكي 🥰 ولهيك كتير مهم منك تحكي معي هلق لأني صرت وعيان على شي اسمو حديث وصرت بفهم نبرة صوتك وبحفظها يعني بعرف ايمت عم تغنجيني وايمت عم تبهدليني 👌🏻
👶🏼 هالعمر يا ماما خطير ما بنصحك أبداً تتركي البامبرز المعباية مفاجآت وهدايا قيّمة جنب راسي .. صرت بقدر دوّر حالي وشوف الحفوضة وامسكها وحطها بتمي وتذوق يا معلم 😂🤦🏻♀️
👶🏼 كلشي تطور فيي هلق ، عم أقدر شوف أكتر وألحقك بعيوني وهي ميزة جديدة بهالعمر .. عم أقدر أسمع وشم وميزك أنتِ وبابا ولو أطفال الحارة زارونا بصير بتفاعل معهن وبحكي كمان وأضحكلن 👼 حتى أنو حس اللمس عندي بيتطور لهيك لحتى تقويلي حواسي لازم تمسكيني وتدوري فيي وتلمسيني السجادة تقليلي هيي سجادة ، الشحاطة هي شحاطة ، وتجيبلي كتب فيها صور كبير وملونة تورجيني وتعلميني ❤️
👶🏼 الخشخيشات والزميرات والألعاب المدندلة يلي بقدر حركها بأيدي وهزها وشوطها كلها هي بتسليني ولا تنسي وضعية غليندايزر كمان ها 😍 بتقويلي عضلات رقبتي وضهري وبتجهزني حتى أتدحرج 😂❤️
👶🏼 أخيراً يا ماما بهالعمر بتخلى حضرتي عن كل الحركات المسطّلة يلي كانت تسطلكن متل مسكة الإصبع الضخمة بالأيد الناعمة تبعي 🤭 بس مع هيك رح ضل حاطط أيدي بإصبعتك الحنونة ورح أتطلع عليكِ بعيوني اللي عم تلمع حب الك ورح قلك بلغتي الطفولية البريئة بنبرة بتبشه نبرة صوتك الحنونة ..
بحبك ❤️
لأني عنجد بحبك ❤️
كنت معكم سَماح صالح محمد ♥️
(سماعة حكيم)
المصدر :
https://www.pregnancybirthbaby.org.au/amp/article/babys-growth-and-development-3-months-old#aoh=16398420950030&referrer=https%3A%2F%2Fwww.google.com&_tf=%D9%85%D9%86%20%251%24s
https://www.pampers.com/en-us/baby/newborn/article/3-month-old-baby
Samah Saleh Mohammad
يا عمري البيبي والحكيات وشو لطيفة اللي كاتبتهن ♡♡
لا تنسوا تحملوا #تطبيق سماعة حكيم