أنت بتعرف أنو خلايا جلدك بتموت لتطلع خلايا جديدة محلها ؟ وها

أنت بتعرف أنو خلايا جلدك بتموت لتطلع خلايا جديدة محلها ؟ وهالشي أكيد بصير بدقة حكيمة بوقت محدد وبعدد محدد وهاد نعمة من النعم يلي أنت ما بتشعر فيها !

طيب تخيل لو جهازك المناعي اجا وصار ينشط تكاثر خلايا جلدك بفترة أسرع بكتير من الطبيعي .. رح تتكاثر هالخلايا وما تلحق تتمايز ورح تموت بس ما رح تقدر تتساقط فرح تتراكم وتعملك التهاب بجلدك وهون أنت رح تصير مصاب بمرض جلدي اسمو الصداف .

مشكلتك مانها جلدية وبس !
مشكلتك نفسية بالدرجة الأولى بعدين جلدية للأسف 💔
رح تلاحظ أكتر شي على كواعك ركبتك فروة راسك هالمنظر يلي بالصورة سطح أحمر منسميه سطح حمامي وعليه هالقشور وبس تحاول تشيلها حتشوف بقع نزفية تحتها .. طبعاً هالمظهر ممكن يطلعلك بأي مكان بجسمك وممكن يعملك حكة أو حرق حسب أنت وحساسيتك منو ..

وهالمظاهر الجلدية البشعة حتطلعلك بشكل هجمات وحتضل رفيقتك كل عمرك ورح تعاني بمجتمعك كل يوم من نظرة ال ” يا حراام ” ومن وصفات وعلاجات الها أول ما الها آخر منها يلي ما رح تفيدك ومنها يلي رح تأذيك .

طالما مشكلتك مناعية فما في شي بالدنيا بيضبط مناعتك قدك فمرضك علاجو الناجع أنك تطنشو حتى يطنشك لكن الطب وقت ما بعالج سبب بروح ليعالج عرض لهيك في عندك خيارات أمامك حتى تخفف قدر الإمكان من الأذى الحاصل معك .. بالدرجة الأولى بينوصفلك العلاجات الموضعية من ستيروئيدات موضعية يعني بتنحط عالجلد مو عبر الفم لكريمات فيها فيتامين د .. شافوا أنو فيتامين د بيضبط تكاثر هالخلايا المخبص !

في علاجات جهازية ؟
في اي وبتقوم على مثبطات المناعة بس هي بتنعطى للحالات اللي جداً شديدة وحادة وما نفع معها شي موضعي .

في عدة أمور بتحرضلك الهجمة أولها وأهمها توترك قلقك ونفسيتك التعبانة واللي ما منقدر كأطباء نحميك منها بس فينا ننصحك .. الدخان كمان بحرض الهجمة .. أدوية معينة ، الطقس البارد ، الرضوض وحروق الشمس وممكن كمان أكل معين أو شراب معين يحرضلك الهجمة وكل هالمحرضات بتختلف من مريض لمريض لهيك هون أنت طبيب نفسك كلشي بتعرفوا بحرضلك الهجمة بعد عنو بنفسك .

الو أنواع الصداف ؟ اي وماني بصدد ذكرها هلق .

وراثي ؟ لاء بس في استعداد عائلي وبعدها محرض طالع المرض وكشفو .

معدي ؟ لاء طبعاً .

شائع ؟ اي جداً ومن هالكلمة رح اختم مقالي بأني قلك أنت ما عم تعاني وحدك .. في غيرك كتار معهن نفس هالمشكلة الجمالية والنفسية ، ما رح تقدر ولا للحظة أنك تحمي حالك من تنمر غيرك عليك لا بهي القصة ولا بغير قصة بس بتقدر تفهم حالك وتوعى على مرضك وتطنشو قد ما فيك وما تضل عم تروح من دكتور لدكتور ومن هون لهون حتى تعالج المرض نهائي لأنك رح تضيع وتتعب عالفاضي .. العلاج بمدرسة الطب واحد إذا حبيت تطلع عليه أكتر شوف المصدر وبحاث فيه 👇

بتمنالك من قلبي هجوع المرض وراحة البال والصحة والعافية 🙏🏻

كنت معكم سَماح صالح محمد ❤️

(سماعة حكيم)